Shillong, Naitung 27: U Deputy Commissioner ka West Garo Hills Swapnil Tembe, ula hukum ban thung da ka jingtohkit Magistrate (Magisterial Inquiry) halor ka jingpyniaid ia ka farmhouse da u MDC ka BJP Bernard N marak, hadien ka jinglap jong ki Pulit bala pyndonkam ia kane ka jaka kum ka jaka khaii met.
Ia kane ka jingtohkit la aiti ban khlieh da ka EAC bad Magistrate Rezia Ch Sangma bad la buhpor ban aiti ia ka kaiphod hapoh ka 15 sngi.
Ki mat ba kongsan jong ka jingtohkit ki kynthup la u Bernard u dei hok shisha ne em u trai jong kane ka farm house bala tip kum ka Rimpu Bagan.
La u Bernard ula shim jingbit ne em na ki bor ba dei khmih ne ki Tnad ba dei peit ban pyniaid ia kane ka farmhouse.
La ka map jong kane ka jingtei ha Rimpu Bagan ka dei kaba shong ain bad ka dei ne em kaba la ioh jingtip na ki Tnad ba dei khmih.
La ka jingtan bording elektrik ha Rimpu Bagan ka dei kaba shong ain bad la kane ka jaka ka ju siew thikna ne em ia ka bai bording.
La ka jingtan um ha Rimpu Bagal ka long kaba shong sain bad la ju siew ne em ia ka bai um.
La kala don ne em ka jingai licence ia u trai jong ka Rimpu Bagan ba un die kyiad bad pyniaid ia ka jaka bam (canteen).
La kala don ne em ka jingleit jurip ia kane ka jaka bam bad ka ka ioh ne em ia ka food safety certificate.
La ka Rimpu Bagan kala ioh jingbit na ki bor ba dei khmih ban buh ia ki khynnah ha kane ka jaka namar la kynnoh ba kila shah pyndonkam kum ki nongtrei.
La ka Rimpu Bagan kala ioh ia kano kano ka jingbit ha ki snem bala leit noh ban pynlong ia kino kino ki tamasa ne ki prokram.
