Guwahati, Naitung 27 : Mynta hapoh Assam ka kad liengsuin LGBI ha Guwahati ka ba dei ka kad liengsuin ka ba bunkam tam ha ka thain shatei lam mihngi (Northeast) jong ka India ka la sakhi ia kawei pat ka bynta ka ba thymmai.
Hapoh ka shi snem hadien ba ka Adani Group ka la don ia la ka jong ka kynhun pahara ka la shimti ia ka jingtreikam hapoh kane ka kad liengsuin ha Guwahati. Watla katta ia ki kam pahara ba kongsan ka dang iaid sha bad ki bor pahara ka CISF. Ha ka kynhun ka ba nyngkong ki la don 45 ngut ki bor pahara shimet ki la dep ban thung hapoh kane ka kad liengsuin.
Kane ka la wan long ruh hadien ba ka la mih ka jingtyrwa ha kane ka snem ba ladep na ka tnat pynher liengsuin sha ki nong pyniaid kad liengsuin ban phaikhmat sha ki kynhun shimet ha ka ba iadei bad ki jingtreikam jong ki nongtrei pahara hapoh ki kad liengsuin, kata lait noh ha ka ba iadei bad ki bor pahara ki ba khmih ia ki kam shongshngain.
Kane ka dei ka jingshim rai ka ba la pynleit jingmut bha da ka tnat Bureau of Civil Aviation Security bad ki private security agency hadien ba la ioh ia ka jingmynjur na ka BCAS. Ia ki katto katne ki kam pahara ki bym dei halor ki kam shong shngain la pynkhamti ha ki tnat pahara shimet.
“Ki katto katne ki bynta ki bym donkam ia ki bor pahara ka CISF ki long ha ka ban khmih ia ki tiket, ban khmih ia ki lynti iaid hapdeng ki ba mih bad ki ba rung. Kine baroh kim dei ki mat ki ba kongsan, bad mynta ia baroh ki kam pahara katkum ki kyndon jong ka BCAS yn khmih da kine ki kynhun pahara shimet…ngila dep pynrung lypa haduh 50 ngut na ki,” ong u Utpal Baruah u ba dei u Chief Airport Officer jong ka LGBI Airport.
“Kane la khmih lynti ruh ba kan iarap ban pynduna ia ka jingiakynduh jingeh halor ki kam pisa ha ka ba iadei bad ki jingtreikam hapoh ki kad liengsuin..ka ba talasi ia ki briew shwa ba kin rung hapoh ka kad liengsuin, ka jingbishar bniah bad ka jingleh ia kiwei pat ki bynta jong ka jingpahara ki dei ki bynta ba kongsan hapoh ka kad liengsuin. Ki la ioh ia ka jinghikai na ki CISF bad mynta ki la ia don ryngkat lang bad ki,” ong shuh shuh u Baruah.
