Shillong, Naitung 27 : U Myntri ka tnad ka koit ka Khiah ka jylla u la pyntip ba ka sorkar jylla kam pat lah satia ban shim rai haba iadei bad ka jingkyrpad ban shimti pynïaid hi noh da ka sorkar ia ka EMRI 108 ha ka jylla.
Ia kane la iathuh da ka President ka Meghalaya EMRI Workers Union (MEMRIWU) Microlina Syiemlieh hadien ka jingkynduh ia u Myntri hynne ka sngi balang.
Haba kren bad ki lad pathai khubor, katei ka nongialam ka la iathuh ba u Myntri u la pyntip sha ka Union ba ka jingkhot tender ka la iaid shaid shaid na ka bynta ka kompeni thymmai ban pyniaid ia ka 108 ha ka jylla namarba ka sorkar kam kwah shuh ban pynthymmai ia ka kontrak bad ka GVK.
“Ngi la kyntu ia u Myntri ban shimkhia ia katei ka kam bad ban pynïaid hi noh ia ka EMRI 108 ha ka jylla namar kane ka bor pynïaid ba mynta ka la phiel ha ka jingtreikam,” ka la ong.
Shuh shuh ka la ong ruh ba ha katei ka jingialang wat hadien ba ki la kyntu jur ia u Myntri ban dawa ba ka sorkar ka dei beit ban shimti pynïaid hi noh khnang ba ka jingshakri kan long kaba kham paka ia ki paidbah ka jylla, hynrei ka jubab ba ki ïoh kam pynhun satia ia ki.
Ka la ong ruh ba ka jingkular ba u Myntri u ai ka long tang ban pyntikna ba ki nongtrei nangne shakhmat kin ym kynduh jingeh shuh.
Shuh shuh ka ong ruh ba u Myntri u la pyntip ruh ba ym pat don ki jylla ha ri India kiba pynïaid hi ia ka 108 bad kumta ka sorkar Meghalaya ruh kam don jingthmu satia ban pynïaid hi.
“Na ka liang ka Union ngi la kyntu ia ka tnad ka Koit ka Khiah ban rah ka kane ka Ishu ha ka Kynhun Myntri ban ia kren lang ba kumno ka sorkar kam lah ban shim rai ba kan Pynïaid hi ia ka 108 ha ka jylla,” bynrap biang ka Microlina.
Na ka liang katei ka nongialam ka ong ruh ba u Myntri u la pyntip ba ka sorkar jylla kan ym ailad satia ba kiwei ki kompeni ba kin leh bein ia ki nongtrei nangne shakhmat.
