Shillong, Rymphang 05 : Ka Sorkar kala hukum ban pynlong ia ka jingtohkit kaba bniah halor ka jingiap ki nongbylla tih dewiong ha ka jingbthei bomb ha kawei ka par tih dewiong beain ha Thangsku, East Jaintia Hills District ha ka sngi Palei.
Ki Pulit kila ioh ban tam haduh 16 tylli ki metiap jong ki nongbylla na kane ka par.
U Myntri Rangbah ka Jylla Conrad K Sangma ula pynpaw ia ka jingsngewsih halor kane ka jingjia ha kane ka par dewiong ha East Jaintia Hills.
Haba thoh ha social media, u Conrad ula ong “ Sngewsih jur halor ka jingjia ba sngewsih ha ka par dewong ha EJH. Ka jingsngewlem naduh mynsiem sha ki longiing kiba la duh noh iala ki baieid bathoin ha kane ka jingjia”.
“Ka Sorkar kala hukum ia ka jingtohkit kaba bniah halor kane ka jingjia. Yn tyndong ia ka jingbahkhlieh bad kito kiba donkti kin ngat ha ka jingpynshitom kaba tyngeh. Kan ym don ka jingiapein haba iadei bad ka jingshngain ki jingim” ula ong.
Ha kum kane ka por ba sngewsih, ka Jylla ka don ryngkat bad baroh kito kiba shah ktah.
