Shillong, Naiwieng 28 : U General Secretary ka Khun Hynniewtrep National Awakening Movement (KHNAM) u Bah James MA Neng, ula pyntip ba ka KHNAM kala pynkhreh shaid shaid ban pynieng ia ki kyrtong na ka bynta ka elekshon MDC ka ban wan.
“Halor ka elekshon MDC, ka seng kala lum iaka jingialang jong ka Executive Committee bad kala thung iaka Election Committee ka ban peit ia ki kyrtong kiba wan aplai tiket na ki constituency bapher bapher” ong u Bah James.
Ula ong, hadien ba ka Election Committee kan aiti ia ki kyrteng, ka Executive Committee kan sa shong ia ka jingialang ban shim ia ka rai iano ban ai tiket bad iano ban ym ai.
“Haduh mynta ngin ym pat lah ban pynpaw ia ka kyrteng ki kyrtong bala wan pan ticket bad haduh mynta ki don kumba 8 ngut kiba la pan tiket, hynrei kila don pat kiba la shu kren lyngba ka phone ia kaba kim pat ai ia kano kano ka jingthoh sha ka seng ban pan ia ka tiket ban iakhun ia ka elekshon MDC” ong u General Secretary ka KHNAM.
Ula ong ruh ba ka KHNAM kan sa lum ia ka jingialang ban iakren na ka bynta ka elekshon MP Lok Sabha na Shillong Parliamentary Constituency la kan pynieng ne kan ym pynieng kyrtong ha katei ka elekshon.
“Ka Elekshon MP ka long ka kam kaba kham ïar ia kaba ngi donkam ban iatai bniah bhabad ka Executive Committee kam pat shim ia kano kano ka rai bad ka dang buhteng ia kane ka kam” ong u Bah James.
