Shillong, Naitung 17: U nongialam ka Bharatiya Janata Party (BJP) Meghalaya bah Sanbor Shullai hynne ka sngi Nyngkong, ula kyntu iaka sorkar pdeng ba kan pyllait iaka Meghalaya naka jingtreikam ka Uniform Civil Code (UCC) namar kane kan ktah iaka jinglong kyrpang ka jylla haba iadei bad ka jingsam iaka ioh pateng sha ki khun kynthei.
Haka shithi sha Chairman ka Law Commission u Justice Ritu Raj Awasthi, u bah Sanbor ula ong “Ka UCC lada pyntreikam ha Meghalaya kan ktah bad ban tuklar iaka jinglong kyrpang haba iadei bad ka hiar pateng kaba ka jylla ka ai sha ki khun kynthei. Ka sorkar pdeng kala dep ban pyntreikam iaka CAA bad kala pyllait ruh iaki jaka kiba hap haka jingkhmih ki riewlum bad dei namar kane ka UCC ruh kam dei ban treikam ha ki jaka ba shong ki riewlum ka jylla ha Meghalaya”.
“Kum shi bynta ban pynsahnam bad pynsarong iaka jinglong kyrpang ka Meghalaya katkum ka riti dustur ka ri India, nga kyntu iaka sorkar pdeng ba ka Meghalaya kadei ban lait na kane ka jingtreikam ka UCC” ula ong.
U bah Sanbor ula ong ba kino kino ki ain ba pyntreikam hapoh ka ri India kidei ban long k ain kiba iada iaka riti durtur khamtam iaki rit paid jong ka thain shathei lammihngi jong ka ri India.
Ula ong ba ka jinglong kyrpang ki Khasi, Jaintia bad Garo jong ka jylla Meghalaya kala paw ruh hapoh ka riti synshar ka ri India (Constitution) bad kane ka jingtyrwa ban pyntreikam iak UCC kan ktah iaka riti dustur ba ki paidbah ka Meghalaya ki ju leh naduh ki por mynshswa.
Napdeng ki rit paid hapoh ka thain shathei lammihngi, ki Khasi, Jaintia bad Garo jong ka jylla Meghalaya ki don ka jinglong ba kyrpang bad ia kine ki riti dustur la ioh ruh ka jingiada naka riti dustur ka ri India lane ka Constitution.
U bah Sanbor ula ong “Ba ka Law Commission haka jingpyntip bala pynmih kala pan jingmut na ki paidbah bad dei namar kane kum u nongmihkhmat ka jylla nga pynpaw ba kane ka jingpyntreikam iaka UCC ban ktah bad kan tuklar iaka jinglong kyrpang ka riti dustur bad synshar ki paidbah ka jylla Meghalaya” ula ong.
Pule ruh:Â Maham u DC ban leh tyngeh ia ka ACHIK ba shong shah jingit be-ain
