Tura, Naitung 17: U Deputy Commissioner ka West Garo Hills, Jagdish Chelani, ula maham ban leh tyngeh kat kum ka lynti ka Ain pyrshah ia ki dkhot ka A’chik Conscious Holistically Integrated Krima (ACHIK) lada kim pynkut noh ia ka jing shong shah jingit khlem pud hapoh ka sngi Nyngkong haba ong ruh ba kane ka kynhun kam shym la ioh jingbit bad ka dei ka kam kaba be-ain.
Ula pyntip ba ka jingbit bala ai sha ka ACHIK ka dei tang na ka bynta shisngi, kata ha ka 11 tarik Naitung. Ha ka sngi ba bud, ka kynhun kala pyrsdang ban pynbteng sa shisnem
bad bynrap ba ka jingshah jingit kan shu dei bynta lang jong ka jingiakhih ha kaba ki bor District kila kyntait ban ai jingbit.
U DC ula pyntip ba watla ki bor District kala ia ki ban pynlong ia ka jingiakhih ba jai jai haduh 7 sngi kynthih hynrei ki khlem pynpaw eiei ruh em haba iadei bad ka jingshah jingit.
“Ha ka jingshisha ka kynhun kala kyrpad ban shu iakhih jai jai na ka bynta shisngi. Ngi la ai jingbit ha ka 11 tarik Naitung bad haba bud kila kyrpad biang bad buh ruh ia ka prokram shah jingit ia kaba ki bor District kim shym la pdiang bad haduh mynta kim shym la ai jingbit ba kin iashong shah jingit” ong u Chelani.
Ka tyllong khubor ka pyntip ba ka kynhun ki Nongiakhih ha ka sngi U Blei kila kular ban pynkut noh ia ka jingshah jingit hapoh ka por 4 baje janmiet ha ka sngi Nyngkong lada u DC u leit ban iuhkjat ha ka jaka ba ki iakhih, ia kaba ula leit ban jngoh ia ki ha ka sngi Nyngkong hynrei ym tang ba la pynkut noh ia ka jingshah jingit hynrei kila nang mih bun ruh ki briew ba iasnohkti lang ban iashah jingit.
Pule ruh: Kynmaw burom ki Sengbhalang bad HNLC ia ka sngi iap u Tirot Sing Syiem
