Shillong, Iaiong 05: U Member of Parliament (MP) ka Lok Sabha u Bah Vincent H Pala hynne ka sngi Balang ula phah da ka jingthoh sha ka Sorkar Pdeng ban mang T.10 Klur na ka bynta ki samla ka thaiñ shathei lamihngi kiban iakhun iaka eksamin IAS.
U Bah Pala ula phah daka jingthoh sha u myntri ka sorkar pdeng uba khmih iaka tnad DONER u G. Kishan Reddy ban kyntu ban mang kyrpang iaka pisa T.10 Klur ia ki samla naka thaiñ shathei lamihngi (North East) ban iakhun ia ka eksamin IAS.
Ha ka shithi kaba la phah da u bah Pala, ula kdew ba ka jingpass ki briew na ki phra tylli ki jylla ka thaiñ shatei lam mihngi iaka eksamin IAS bad IPS ka long kaba duna bha man u snem, lait noh katto katne ngut kiba na ka jylla Assam bad Manipur.
U bah Pala ula pynpaw ba ki sorkar jylla ka thaiñ shatei lam mihngi kila pyrshang ban shim iaki lad ki lynti ban iarap ia ki samla, hynrei dei tang ha u snem 2017 ba ki don 24 kiba Pass na kane ka thaiñ bad kadei ruh ka snem kaba bun eh ki samla ka thaiñ kiba Pass ia ka eksamin IAS bad IPS.
Ula pynpaw, ba hadien 2017, ka jingpass jong ki samla na kane ka thaiñ kala nang hiar namar ha u snem 2018 kiba Pass ki don tang 13 ngut, ha u snem 2019 kiba pass tang 11 ngut bad ha u snem 2020 ki don tang 9 ngut.
U bah Pala ula ong, ba ki don shibun ki samla kiba stad hynrei kam don pat ka jingbtin lynti iaki khamtam iaki jaka ai jinghikai bad ula kyntu ia u myntri ka DONER ba un leh ei ei halor kane khnang ba ki samla kin ioh iaka jinghikai la ka long ha Delhi ne ha ki nongbah jong ki jylla.
U Bah Vincent u la ai jingmut ia u myntri ka sorkar pdeng ban mang pisa bai bam T. 10 klur tyngka na ka bynta kiba shah jied ban ia khun ia ka eksamin IAS bad IPS.
La kyntu ruh ban buh ia ki jaka ai jinghikai da kaba buh ia ki kynhun kiba tbit ban ai jinghikai ia ki samla kane ka thaiñ kin ioh ia ki jinghikai khnang ba ki samla kane ka thain kin ioh ban ia khun ia kitei ki eksamin.
