Shillong, Jymmang 12 : U Myntri ka tnad Pule Puthi Rakkam A Sangma ha ka sngi Nyngkong, ula pyntip ba ka Tnad Education kala thoh shithi sha ka Tnad Urban Affairs ba kan ai jaka lem na ka bynta ban seng ia ka Shillong campus ba shirta jong ka Captain Williamson Sangma State Universty.
Haba iakren bad ki nongthoh khubor, u Rakkam ula ong “Haba iadei bad ka jinglong jingman jong ka State University, ngi la dep pynkhreh lut nadong hadong. Ki college kiba la aplai ban pyniasoh, kila sdang ban pynrung klas ia ki khynnah. Kam shym la don jingeh satia”.
Ula bynrap ba katba ka Tnad ka dang ap ia ka jaka na ka bynta ka Shillong campus ba pura, mynta ki kam kila iaid ban ithuh shuwa ia ka Ophis ba shipor jong ka Shillong Campus ka State University.
“Ha ka jingshisha ngi thmu ban pyndonkam ia ka Bijni Complex ha Laitumkhrah hynrei ka NEHU kala rah ia kane ka kam sha ka Iingkashari High Court haba tynjuh ia ka jinglong trai jong ka Bijni Complex. Kumta, ai ba ka Iingkashari kan rai shuwa ia kane ka kam” ong u Rakkam.
Haba kylli, ula ong “Ka NEHU kala kam ba ka (Bijni Complex) ka dei jong ka bad ka Sorkar Jylla ruh kala kam trai iaka jaka. Ka NEHU kala tynjuh ia ka jinglong trai ia ka Bijni Complex. Ai ba ka Iingkashari kan rai. Ia mynta, ngi dang wad ia ka jaka ba shipor ban sdang noh ia ka Shillong Campus”.
