Shillong, Lber 14 : Ka Sorkar Jylla kala kular ban iasyllok ia baroh ki kynhun ha ka por ba thaw ia ka rule jong ka Meghalaya Investment Promotion & Facilitation Act, 2024.
Ia kane la pyntip da u Commissioner & Secretary ka tnad Home (Political) Bah Cyril Diengdoh ha ka shithi bala phah sha u President ka Khasi Students’ Union (KSU) samla Lambokstar Marngar ha ka sngi Palei.
Kane kala mih ruh tang da ki sngi hadien ka jingialang bala pyniaid da u Myntri Rangbah Conrad K Sangma bad ki Nongialam ka KSU, kiba dawa ban pynduh pyndam noh ia ka MISPF.
“Baroh ki kynhun kynthup ka seng jong phi yn sa iasyllok ha ka por ba thaw ia ki rule jong ka Meghalaya Investment Promotion & Facilitation Act, 2024 haba shim ruh ia ki jingai jingmut bala buh hakhmat da ka seng jong phi ha ka jingiakren ba long hynnin ka sngi” ong ka shithi.
Kala ong ruh “Ki jingsngewkhia jong ki sengbhalang kynthup ka seng jong phi halor kane ka mat la dep ban pynrung bad pynbeit ha ka amendment bill bala wanrah hapoh ka Dorbar Mang tyngka jong ka Iingdorbar Thaw Ain”.
Kine ki long : Ka Meghalaya Investment Promotion & Facilitation Act, 2024 kan ym pyntroin ia kano kano ka kyndon jong ka Meghalaya Transfer of Land (Regulation) Act, 1971, kan ym iaid lait ia ki kyndon ba iadei bad ki Autonomous District Council (ADC), kan pynthikna ia ka lad thungkam ia ki trai shnong ha kaba 90% ka kam yn bhah ha ka kyrdan non-managerial bad 50% ha ka kyrdan manager”.
Halor ka mat ban thied land bank da ka MIPA, ka Sorkar kala shimkhia ia ki jingsngewkhia jong phi bad kan sa pynbeit ia kane ka kam ha ka rynsan kaba dei, ong ka shithi.
