Shillong, Nohprah 05 : U Myntri Rangbah ka Jylla Conrad K Sangma ha ka sngi Ba-ar, ula pyntip ba ka Sorkar Jylla kala dep thoh shithi sha ka Sorkar Pdeng ba kan pynrung noh mardor ia ka ktien Khasi bad Garo ha ka Khyrnit ba Phra jong ka Riti Synshar ka Ri.
Haba iakren bad ki Nongthoh khubor, u Conrad ula ong ba ka shithi ba khatduh bala phah da ka Sorkar Jylla ka dei ha u bnai Naiwieng hadien ka jingialang bad ka Khasi Author Society (KAS).
“Ha ka jingshisha, hadien bala mynjur ia ka Resolution, la bunsien nga la thoh sha ka Sorkar India ban pynrung noh ia ka ktien Khasi bad Garo ha ka Khyrnit ba Phra” ong u Conrad.
“Hadien ba ka KAS kala iakynduh ia nga dang shen, tang ha ka taiew ba nyngkong hi,nga la thoh shithi sha ka Home Ministry ba pynkynmaw biang ia ki…Kumta mano mano ba kynthoh, ki dei ban wad bad kylli na ngi shuwa ban shu pynman hi kumto namar ka pyni da kumwei pat sha ka pyrthei” ula bynrap.
