Shillong, Nohprah 05 : U Myntri Rangbah ka Jylla Conrad K Sangma ha ka sngi Ba-ar, ula kyntait war ia ka jingkynnoh ba ka don ka jyrsieh bamsap halor ka jingpyntreikam ia ka Eco-Tourism Project ba T. 13 klur hapoh ka Jylla.
Haba iakren bad ki nongthoh khubor, u Conrad ula ong “Ka khubor kaba mih, ka jingwad jingtip bad ka jingkhein ba kila pynmih ka dei kabym dei bad kaba ialam bakla. Ka jingkhein ka bakla. Ka dei ka project ba T. 13 klur bad ki don haduh 8-9 tylli ki jaka kaba ki jingtei ki dei ban mih”.
Kat kum ka jingong jong u, kane ka dei ka project bala bei tyngka da ka NEC ha u snem 2017 shuwa ba ka Sorkar MDA kan wan ha ka bor synshar ha u snem 2018.
Haba pynpaw ba bun na ki jingtei ha ka jingshisha kila dep laitnoh tang ha shi ne ar jaka, u Conrad ula ong, ba ki don katto katne ki kam ki bym pat dep lane dang sah ka jingsiew pisa.
“Hynrei nalor kane, ki don artylli kiei kiei. Kawei ka long ba kam dei T.1300 klur, u nongthoh khubor ula bakla shaba palat bad kila ialam bakla ia ki paidbah namar ka dei ka project ba tang T. 13 klur. Kaba ar, kumba nga ong, ka long kaba suk eh ban shu pyndonkam ia ka ktien jyrsieh, jyrsieh bad jyrsieh bad pynkha ia ka jyrsieh nalade hynrei ka bym don pat ka jyrsieh. Ka dei ka project kaba la dep ban pyntrei” ula ong.
“Kawei ka song ba T. 90 lak, ka don katto katne ki kam ba dang sah ia kaba lada ym pat pyndep ia ka kam, ka jingsiew ruh kan ym don…ngi dang iakhmih ia kane ka bynta hynrei ban shu pynman hi da ki kyntien ba khraw ha ka kot khubpr b aka dei ka jyrsieh ka dei ka jingleh ba khlem ka jingkitkhlieh” ula bynrap.
U Conrad ula ong ba u nongthoh khubor bad ka kot khubor ki dei ban phikir bha ha kum kine ki jingthoh ba ki pynmih namar ki hap ban da wad bniah bad sei ia ka jingshisha ym ban ialam bakla ia u paidbah.
