Shillong Naitung 04: Ka Hynniewtrep Youth Council (HYC) hynne ka sngi Baar, kala kyntu iaka Law Commission ban bthah iaka sorkar pdeng ba kam dei ban pyntreikam iaka Uniform Civil Code (UCC) ha ka jylla Meghalaya.
Ha ka shithi kaba la phah da ka HYC sha u Member Secretary jongka Law Commission, na ka liang u President ka HYC Bah Robertjune Kharjahrin ula ong, “Ngi la ai jingmut iaka Commission ba kan phah ia ka jingbthah sha ka sorkar pdeng ba ym dei ban pyntreikam iaka UCC ha Meghalaya namar kan pynduh bad bujli ia ki deity tynrai bad ia ki dustur tynrai bad kan pyntroin ruh iaka ki kyndon jongka Sixth Scheduled bad ia ki bor jongki Autonomous District Councils bad kan tuklar ruh iaki kam jong ki niam bapher.
Ka HYC kala aiingmut ia ka Commission kadei ban bthah iaka sorkar pdeng ba kan iarap iaka Autonomous District Councils ha Meghalaya da kabaai jingkuyrshan haka pisa ka tyngka bad kiwei kiwei ki jingiarap bad jingbtin lynti ba kin pynlong aiñ ia ki jingleh ne ki aiñ kiba la don lypa naduh ki por mynshwa bad ban thaw ia ki ain ki bapher kiba iadei bad ka personal law.
U Bah Kharjahrin ula ong ba ki District Council lyngba ka Sixth Scheduled jongka Constitution of India la pynkup bor ba kin thaw ia ki ain kiba iadei bad jingiashong kurim, jingpyllait san shyieng, ka jinghiar pateng bad ki deity tynrai kiba kynthup iaka jingai jait, ka jingtingkhun, bad kiwei kiwei. Namar mynta la palat 72 snem ba la don ki ADC ha Meghalaya, kila trei shitom iala ka kamram ban iada bad pynnehpynsah ia ki riti ki dustir bad ki deity tynrai jong u Khasi-Jaintia/Hynniewtrep ha kaba iadei bad ki personal law.
Ula ong ba ki riewlum haduh mynta ki dang don iaka jingshaniah ha ki ADC ha kaba iadei bad ki paidbah ki pyrshah jur ia kino kino ki bor sorkar kiba pyrshang ban pynduhjait ia ki riti dustur tynrai kiba la don lypa ha ka jylla naduh kip or hyndai hynthai.
Ka HYC kala pynpaw ba ki riewlum jong ka Meghalaya ki pyrshah jur ban pyntreikam iaka Uniform Civil Code namar kane kan pynduh jait bad kan pynmih bujli iaki riti dustur bad ki deity tynrai kiba la don lypa ha ka jylla.
Kila pynpaw ruh ba ka ri India kadei kaba don bun tylli ki jait Niam bad ka riti synshar ka ri kala pynkupbor ban iada ia kawei pa kawei ka niam bad ka jylla Meghalaya kadei kaba bun ki Khristan bad ki don ruh ia ki paidbah kiba dang bat iala ka niam tynrai bad ki riewngeit Hindu, Muslim bad kiwei kiwei.
“Ngi don iaka jingsngew ba ka UCC kan pynduh ia ki kyndon niam kiba iadei bad ka jingiashongkurim bad jingpyllait san shyieng bad kiwei kiwei bad ngi sngew ba kadei ka kamram katkum ka riti synshar ka ri ban burom ia kano kano ka niam bad ban ailad ia ki niam bapher ba kin bud iala ki kyndon ha ka rukom ngeit bad ym dei ban pynmih bujli ia ki kyndon lyngba ka Uniform Civil Code,” ong u nongialam ka HYC.
 hynne ka sngi Baar, kala kyntu iaka Law Commission ban bthah iaka sorkar pdeng ba kam dei ban pyntreikam iaka Uniform Civil Code (UCC) ha ka jylla Meghalaya.){kind=link}