Dawa wengkam shipor ia u Pulit MPS
Shillong, Nailar 31: Ka Bharatiya Janata Party (BJP) hynne ka sngi Balang kala rai ban tied noh ia ka jingkhang ka Iingkashari ban dawa tohkit da ka kynhun ba laitluid halor ka jingshah kem u Vice President bad MDC ka Tura, Bernard N Marak.
Ha kajuh ka por, ka BJP ka dawa ia ka Sorkar Jylla ban wengkam shipor ia u Assistant Inspector General of Police (AIG) Bah GK Iangrai namar ka jingkynnoh donkti ha ka jingpyndonkam bakla ia ki 29 tylli ki kali bad ban plie lynti ruh ia ka jingtohkit ka CBI halor kane ka kam.
Ha ka kyrwoh, u Nongialam ka BJP State Executive Member Pawan Sharma ula pynrem jur ia ka Sorkar halor ka rukom leh ia ka kam ba iadei bad u Bernard N Marak.
“Kat kum ki khubor ha ki lad pathai khubor, ka jingleh jong ki Heh Pulit kiba pynbor ia ki kynthei ban kam ialade kum ki nongkhaii met ka dei kaba ktah bha” ula ong.
Haba kynnoh ba ka lah ban dei ka kput politics da ka jingpyndonkam ia ki bor Pulit ban pynseisoh, u Pawan ula ong “Ngim don lynti pat da kumwei, ngin sa tied ia ka jingkhang ka Iingkasahri ban dawa ia ka jingtohkit jong ka kynhun ba laitluid”.
Ha kawei pat ka liang, u Pawan ula ong baka jingkynnoh bamsap pyrshah ia u Bah GK Iangrai hapoh ka Tnad Pulit kala ktah jur ia ki nongshongshnong ka Jylla bad kila duh ia baroh ka jingshaniah ha kane ka Sorkar.
“Dei ban tohkit CBI noh kham kloi ia kine ki jingkynnoh. Kumno ruh ka Tnad Pulit ka lah ban tohkit hi dalade ia kat kane ka jingkynnoh. Ka Sorkar lada ka dang don ka jingiatiplem, ka dei ban wengkam noh shipor ia u Bah GK Iangrai” ula ong.
Une u Nongialam ka BJP ula pynpaw ruh ia ka jingkyndit ban iohi ia ka kyrwoh bala pynmih da u Superintendent of Police ka West Garo Hills ba kynnoh ia u Bernard halor ka jingkiew dor ki mar ki mata bad klet pat ba ki don shibhn ki daw kiba lam sah ka jingkiew dor.
