Shillong, Iaiong 22 : U Myntri ka Tnad Bording ka Jylla AT Mondal ula pyntip ba ka tnad kan sa bujli noh haduh 1 lak tylli ki post elektrik kiba la sarang bad ki Transformer kiba don jingthut.
U Myntri ula pynshai ruh hynne ka sngi Ba-ar ba ka jingbujli ia u Transformer ba sniew bad ki post elektrik ba sarang ka dei shibynta jong ki kam ba iai bteng na ka por sha ka por, ym ka kam ba tang shisien leh.
“Kam mut ba shisien ba ngi la bujli ia ki transformer ne post elektrik kala biang noh ne ym mih jingthut shuh. Kine kijuh ki transformer ki lah ban thut ne sniew biang namar ka jingkit palat ia ka bording, jingpom pyrthat bad kiwei kiwei. Mynta ngi lah ban bujli ia uwei u transformer ha kawei ka jaka hynrei lashai pat ka lah ban mih biang sa kawei ka jingeh ha kiwei pat ki jaka. Kumta, kane ka kam ka dei kaba iai bteng na ka por sha ka por”.
Haba kylli halor ki kam jong ka Revampes Distribution Sector Scheme (RDSS), u Mondal ula ong “Haba don ka jingdonkam ban pynheh ne kylliang ia u transformer, ngin sa kynthup ia ka ha ka skhim”.
Halor ki jingshngain, khamtam ha ki jaka khlaw ha kaba ki waiar high tension ki iaid lyngba, u Myntri ula ong ba ka jingjia shah lympat u hati khlaw dang shen ha Ri-Bhoi ka dei ka kam kaba hap ban shimkhia bha. Ula ong “Haba phai sha ka jingshngain, kane ka dei ka kam kaba ngi buh hakhmat eh”.
