Thma pyrshah droks | Aipor shibnai ka HYC ia ka Sorkar ban pyntreikam ia ki mat jingdawa | Byrngem tur sha Secretariat

Pynkylla ia ka ANTF kum ka kynhun Pulit ban khmih thik tang ia ki kam droks

Shillong, Naiwieng 07 : Ka Hynniewtrep Youth Council (HYC) ha ka sngi Palei, kala rai ban aipor 30 sngi ia ka Sorkar Jylla ba kan pyntreikam noh ia ki 7 tylli ki mat jingdawa ba kynthup ia ka jingpynlong ia ka Anti Narcotics Task Force (ANTF) kum ka kynhun Pulit ba kyrpang ban iakhun pyrshah ia ki kam khaii droks.

Kane ka Seng kala byrngem ruh ba lada ka Sorkar kam lah ban pyntreikam ia ki mat jingdawa hapoh ka por bala buh, ka seng kan pynlong ia ka jingiatur paidbah sha Secretariat.

Hadien ba ai jingkren ha ka jingialang paidbah ban ialap pyrshah droks ha Motphran hapdeng ka jingpahara kaba jur bha, u President ka HYC Roykupar Synrem ula ong “Ngi la shim ia ka ai. Ngi la rai ban aipor 30 sngi ia ka Sorkar Jylla ban shim ia ki sienjam kiba donkam ha kaban pyntreikam ia ki 7 tylli ki mat jingdawa jong ngi ba kynthup ia ka jingthaw ia ka kynhun pulit ba kyrpang-ANTF bad ban pynmih ia ka jingpynbna halor ki Fast Track Court”.

“Lada kam leh eiei, ka HYC kan nym pynlong shuh ia kino kino ki jingiaang hynrei kan khot ia baroh ki nongshongshnong ka Jylla ban iatur sha Secretariat ban pynpaw ia ka jingpyrshah pyrshah ia ka Sorkar Jylla namar ka jingbym shimkhia ban leh eiei halor kane ka kam” ula bynrap.

Kat kum ka jingong jong u, bunsien ka Sorkar ka kloi bha ban ai jingkular lyngba ki shithi hynrei ka ju shimpor pat ban pyntreikam ia kine ki kular.

Ia kane ka rai la shim hadien ba ka Sorkar Jylla kala ai ia ka jingkular da ka jingthoh ba kan sa leh eiei halor kine ki mat ba la pynsngew da ka HYC hadien ka jingialang bad u Myntri ka Tnad Social Welfare Bah Paul Lyngdoh.

“Ha ka por ba dang iaid ka jingialang paidbah, ngi la ioh pdiang ia ka shihti na ka Sorkar Jylla lyngba u Myntri ka Tnad Social Welfare ba pynthup ba ka Sorkar kala shim ia ki sienjam ba donkam halor ka jingdawa ka Council. Ka shithi ka pyntip ba ka State Level Meeting jong ka DREAM kan sa long ha ka 14 tarik Naiwieng, ka ban pyniaid da u Symbud Myntri Rangbah ka Jylla ba khmih ia ka kam pohiing” ong u Bah Roykupar.

“Ka Sorkar lyngba ka shithi kala kular ruh ba kan sa shim ia ki rai kiba donkam ha kane ka jingialang ban wan ha kaban buh ia ka ANTF kum ka kynhun Pulit ba kyrpang ba kan iakhun pyrshah ia ki kam droks kumba dawa da ka HYC bad ban pynkha ruh ia ki Fast Track Court” ula bynrap.

Kiwei pat ki jingdawa ki kynthup ia ki jaka ai jingsumar bad jingiarap, ka jingdonkam ban pynbun ia kine ki centre, ka free detoxification, OST bad Day Care Centre, ka jingtohkit bad pynsajia ia ki case hapoh ka NDPS Act, ka PITNDPS Act, 1988, ka jingwanrah ia ka Ophis ka Narcotics Control Board (NCB) ha Shillong bad kiwei kiwei.

Namar kane ka surok, baroh ki dukan khamtam jong ki bar Jylla kila khang khyrdep lut naduh ka thain Khyndailad haduh Motphran.