Shillong, Rymphang 05: U Nongaiktien ka Sorkar MDA bad Myntri Sorkar Bah Paul Lyngdoh ula ther tyngeh ia ka Liang Pyrshah Voice of the People Party (VPP) halor ka jingpyrshang ban pynlong kam politics ia ka kam ba iadei bad ka Meghalaya Lokayukta.
Haba iakren bad ki nongthoh khubor hynne ka sngi Nyngkong, u Bah Paul ula ong “Ban pynlong politics ia kane ka kam da kaba ialam bakla ia ki paidbah ka dei kaei kaei kaba nga sngew ba kam iahap satia bad ka dei ruh ka jingpyrshang ban pyn phalang shawei pat ia ka jingmut jingpyrkhat u paidbah na ki ishu ba dei hok, kiba ktah ia ka Jylla”.
Ka VPP dang shen kala pynsangeh ia ka jingiakhih ba dawa thungkam biang ia ki Ophisar bala shongthait kiba thungkam da ka Lokayukta. Kala kynnoh ba ka jingwengkam ia kine ki Ophisar bala shongthait kala wan ha ka por ba ka Lokayukta ka dang khmih ia ka kam bamsap ba donkti u MLA, uba dei shibahaiing bad u Myntri Rangbah ka Jylla.
Hynrei, ka jingshisha hi ka long ba ka Lokayukta ha ka 28 tarik Naitung 2023, kala dep ban chargesheet ia 12 ngut ki briew kynthup ia une u MLA, 9 ngut ki Execument Member bad Secretary ka GHADC nalor arngut ki contractor halor ka jingbym lah pyndep ia ka hostel ki MDC ha Tura, kaba la mang haduh T.6,01,31,100.00.
U Bah Paul, uba dei ruh u Working President ka UDP, ula ong ba ka Meghalaya Lokayukta Act kala kren shai bha ba “Ngim lah ban aikam ia ki Ophisar bala shongthait…namar ka jingtreikam jong kiba la shongthait ka kham duna haba nujor bad kiba dang don ha ka jingshakri”.
Nalor kane, ula ong ba ka Sorkar kam lah ban iaid lait na ka Act, kaba la mih hadien ki jingiakhih kiba bun ha kylleng ki bynta jong ka Ri.
U pyntip ba ka Myntri ka tnad Ain Kong Ampareen Lyngdoh kala dep iakynduh ia ki Nongialam ka VPP, kiba la pan por ban iakynduh ia u Myntri Rangbah ban iakren halor kane ka kam bad u Myntri Rangbah ruh ula dep mynjur ban iakynduh ia ki.
“Nalor kata, ka Dorbar Mang tyngka ban wan ruh kala plie lynti ia ka (VPP) ban iakren ia kane ka kam hynrei ngim lah ban iakren pat ia kaei kaba kren hapoh ka Act” ula ong.
Haba kylli, une u nongaiktien ka MDA ula ong “Ka Lokayukta kam hap satia hapoh ka jingpyniaid jong ka Sorkar Jylla. Phi ruh phi tip bha ia kane. Ka jingthmu ka long ba ka Lokayukta kan ai ia ka jingbishar kaba hok bad bym shah liang bad kam dei satia ka tnad Sorkar. Ki Ophisar ba don hapoh ka Lokayukta ki ioh ban shakri da ka por bad hapoh ki kyndon jong ka Lokayukta Act. Ka jingshong bishar jong ka Lokayukta ruh ka dei kaba lah ban bishar paidbah bad ia ki minutes jong ki jingbishar ruh ki dei kiba lah ban bishar paidbah. Kumta, halor kaei ka nongrim ba ki lah ban leh ia kano kano ka kam da ka jingpynbor ka Sorkar”.
