Shillong, Naiwieng 30: U president ka Khun Hynniewtrep National Awakening Movement (KHNAM) bah Thomas Passah hynne ka sngi u la ther tyngeh ia u chief executive member (CEM) ka Karbi Anlong Autonomous Council (KAAC) halor ka jingkam ba ki Khasi-Jaintia ba sah ha ki thain Mukroh West Jaintia Hills kidei ki poi ei.
U bah Thomas u la ong ba kane ka jingkren da u CEM ka KAAC kadei ka jingkren tohmet bad kajingkren khlem nongrim bad khlem jingtip jong une u CEM.
U bah Thomas u la ong ba kat kum ka jingthoh bad jingwad bniah jong uwei u Historian ba pawnam bha jong ka Assam u Dr. S.K. Bhuyan u la batai ba ki Karbi katkum ka pateng (Racially) ki dei ki naka kynhun “Mongoloid” bad katkum ka ktien kaba ki kren (linguistically) ki dei naka kynhun Tibeto-Burman.
U la ong ba ka shnong tynrai jong kine ki briew Karbi kiba kren Tibeto-Burman ka dei na Western China bad nangne pat ki rung sha India bad Burma.
“La batai ba ki Karbi ki rung sha Assam na Central Asia ha ka jingphetwir kaba jur bha ha kito ki por nangta pat hi ki por ba ki mynshwa bha ki Karbi ki sah ha ki rud jong wah Kalang bad Kapili bad ha shilynter jong ka Kaziranga hynrei ha ka jingshynshar jong ki Syiem Kachari ki la shah beh sha jrong ki lum bad kato katne ki la rung sha Jaintia Hills bad ki Syiem jaintia ki la ai jaka sah ia ki bad ki la im ha ka jingsynshar jong ki syiem Jaintia” la ong u bah Thomas.
U bah Thomas u la ong ba na kata ka daw ka History ka batai ba umdei u Khasi hynrei ki jaidbynriew Karbi kiba dei kita ki phetwir lane kita ki nongwan buhai shnong beain ha u pud u sam ka Meghalaya.
U la ong ba ka jingkren jong u CEM ka KAAC ka pynpaw ia ka jingtlot jong u CEM ka JHADC bad ka sorkar Meghalaya kaba ailad lane pynshlur ia u poiei ban kynnoh poiei ia u Khasi u trai khyndew trai jaka.
Shuh shuh u la ong ba kane ma jingkren khamtam kum ha kane ma por ka wanialam shibun ki jingklumar bad ka pyndiaw ia paidbah kum ka jaitbynriew ka Meghalaya baroh kawei.
“Ka sorkar jylla kadei ban pynpaw sha ka sorkar Assam ba ki Karbi kim dei ban shan ia u ta u mot jong u Forest Guard u ba la iap ha u kuli jong ki Pulit Assam hi bad kam dei ruh pyrkhat ban shna ia kata ka Skul ha Mukroh, ioh ka ding kan dang klan” la ong u bah Thomas.
Nalor kane u president ka KHNAM u la ong ba ka jingkren u myntri rangbah ka Meghalaya ba yn pynsangeh shwa ia ka jingiapynbeit pud namar ka jingjia ha Mukroh ka long kaba phylla namar ki paidbah ki la khmih lynti ba ka sorkar kan peiphang na ka jingjia ha Mukroh bad ban pyrkhat kumno ban pynbeit noh mardor ia u pud u sam namar ka tynrai jong kane ka jingjia ha Mukroh kadei hi namar ka jingbym shai u pud u sam.
U la ong ba ka sorkar Meghalaya lyngba ka sorkar Assam kadei ban bthah ia kine ki nongialam Karbi ba kim dei ban pynklumar lane kynshoit ia u paidbah u ba la bitar namar ki kwah ba kan don ka jingiashongsuk shongsian ha ki thain khappud.
