Nongpoh, Lber 14: Ki nongialam Shnong ka Lumdaitkhla ha ryngkat ka Seng Longkmie ki la shim syndon da ka rai kaba tyngeh ban khang noh ia ki dukan die kyiad beain ne kino kino ki jingdih buaid naduh u Drug, Ganja bad kiwei kiwei ki jingsniew hapoh u pud u sam jong ka Dorbar Shnong.
Ia kane ka rai la shim hadien ka jingialang kaba la long ha ka Dorbar Shnong Lumdaitkhla Bhoirymbong, kaba la iashimbynta naduh ki nongkitkam ka Executive Committee ka Shnong bad kumjuh ki nongkitkam ka Seng Longkmie.
Haba kren hadien ka jingialang, u Bah Tennyson Buiam, u la iathuh, ba ka Dorbar Shnong ka la shim ia kane ka rai ban khang pyrshah noh ia ka jingdon ki dukan die kiad beain ne kino kino ki jingdih buaid hapoh u pud u sam jong ka shnong khnang ban iada ia ki jingsniew kiba har rukom kiba mih tang na ka daw ka jingdie kiad beain kaba la ktah ruh ia ka shongsuk shongshngaiñ jong ka shnong ka thaw.
U la iathuh ruh, ba ha kane ka jingialang nalor ka rai ban khang bad ban nym ailad shuh ia ka jingdie kiad beain bad ruh ia ki nongai wai dukan ban nym ailad ban die ia ki jingdih buaid ha u pud u sam jong ka shnong la shim ruh ia ka rai ban nym ailad ia kino kino kino ki bar jylla ne ki nongshong wai hapoh ka shnong ban leh ia kino kino ki kam kiba long pyrshah ia ka kyndon aiñ Shnong.
Na ka liang ka Seng Longkmie ka la maham ban leh tyngeh ia kino kino kiba leh pyrshah ia kane ka jingmaham bad ka jingkhang pyrshah, kin ngat ha ka jingshah pynshitom kaba jur bad la kyrpad ia baroh ba kin ai ka jingiatreilang halor kine ki rai ba la shim da ka Dorbar Shnong.
