Guwahati, Naiwieng 30 : U Myntri Rangbah (CM) ka Assam u Himanta Biswa Sarma ula ong ba um mynjur satia ha kaba iadei bad ka jingther kuli jong ki pulit pyrshah ia ki riew paidbah.
U Sarma ula ong ruh ba ki bor pulit ki dei ban pyndonkam ia ki tiar siat tang ha kaba iadei bad ki kam lehnoh kumjuh pyrshah ia ki kynhun runar.
Lah ban kdew ba ka jingther kuli ki pulit ka Assam hapoh ka shnong Mukroh kaba la jia ha ka 22 tarik mynta u bnai kala shim ia ka jingim jong ki hynriew ngut ki briew. Napdeng kine ki hynriew ngut, san ngut ki dei ki nongshong shnong ka Meghalaya bad uwei u dei u forest guard ka Assam.
“Ki pulit ki dei ban pyndonkam ia ki tiar siat tang ha ka jingialeh pyrshah ia ki lehnoh bad ki kynhun pyntriem.Kim dei satia ban pyndonkam pyrshah ia ki riew paidbah.Ngam mynjur satia ia ka jingther kuli pyrshah ia ki riew paidbah,” ong u CM ka Assam u Himanta Biswa Sarma hynnin ka sngi ba Ar.
Ha kawei pat ka bynta na ka liang ka national human rights commission (NHRC) kala pynpaw ba ki kynrum kynram kiba iadei bad ki jingiakajia pud hapdeng ka Assam bad ka Meghalaya la iohi ba ka dei kaba la lam sha kane ka jingjia shah ther kuli hapoh ka shnong Mukroh, kata ha khappud jong kine ki ar jylla.
Watla kalong kumno kumno ruh kane ka jingiakajia pud hapdeng ki jylla, hynrei na ka liang ki bor pulit ki dei ban shim ia ki sienjam ban kiar ha kiba kum kine ki jinglong jingman, ong ka NHRC.
Shuh shuh ka NHRC kala ong ruh ba katei ka jingjia shah ther kuli ha ka shnong Mukroh ka dei kaba lah ban kiar, bad kyntu ruh na ka bynta ban weng noh mardor ia ki kam iakajia pud hapdeng ka Assam bad ka Meghalaya.
