Imphal, Naiwieng 30 :Da kaba bteng ia ki jingdawa ki jong ki, ki doktor hapoh ka lama jong ka All Manipur Health Services Doctors’ Association (AMHSDA) kila bteng ban pynlong ia ka jingiakhih shah thngan ha Senapati district ka Manipur kumjuh ha kiwei pat ki district ka jylla.
Lah ban kdew ba haduh hynnin ka 29 tarik Naiwieng, kane ka jingiakhih shah thngan kala bteng sha ka sngi kaba saw hadien ba ka AMHSDA kala sdang ban pynlong ia ka jingiakhih naduh ka 26 tarik mynta u bnai.
Haba kren sha ki lad pathai khubor, na ka liang u leprosy officer ka Senapati district, u Dr Ngouniba Peter ula ong, “Ka long kaba sngew bynniaw shibun ha ka bynta jong ka sorkar jylla namar ka jingleh bym suitniew ia ki jingdawa ki jong ki, kata wat hadien ba kila shim ia ki lynti jong ka jingiakhih bapher bapher.”
Na ka liang ki doktor kila ong ba kane ka jingiakhih kaba mynta ka dei lyngba kawei pat ka sienjam kaba lai hadien ba ka AMHSDA kala dep ban pynlong da ka jingdeng ia ki badge rong iong bad ka jingiakhih da kaba shong kyllain mungor ban pynbor ia ki jingdawa ki jong ki.
Na ka liang ki doktor ka jylla kila dawa ha kaba iadei bad ka jingkyntiew kyrdan kaba katkum ka por bad ka jingpynjlan ia ka rta treikam jong ki doktor sha ka 65 snem nalor kiwei pat ki jingdawa.
“Ngi la buh ia ki phra tylli ki jingdawa ba shonghok sha ka sorkar jylla..na ka liang ka sorkar jylla kala pynbna ba ka jingshakri jong ka tnat ka koit ka khiah kalong kaba donkam, kumta ruh ka jingdawa ka jong ngi ruh ka long kaba donkam,” ong shuh shuh u Dr Ngouniba Peter.
Shuh shuh ula ong ruh ba na ka liang ki doktor hapoh jong kane ka kynhun kim dei ban shah pynbor na ka bynta ban shim shuh shuh da ki sienjam jong ka jingiakhih kiba kham tyngeh.
