Shillong, Naiwieng 30: Ka Hynniewtrep National Achik Movement (HANM) hynne ka sngi kala pynrem jur ia ka jingkam u chief executive member (CEM) ka Karbi Anlong District Council ba ki Khasi ki ba shong ba sah hapoh ka shnong Mukroh West Jaintia Hills kidei kiba wan buhai shnong beain.
Lah ban kdew ba u CEM ka Karbi Anlong District Council u Tuliram Ronghang ha ka jingleit jurip iaka thain Mukroh u la kam ba ki Khasi-Jaintia ba ba shong ba sah hapoh ka thain Mukroh kidei kiba shu buhai shnong bad kidei ki nongtuh dieng.
Haba kren sha ki lad pathai khubor u vice president ka HANM u bah Tyllang Thongni u la ong ba ka seng ka kyntait bad ka pynrem jur ia kane ka jingkren laplah u CEM ka Karbi Anlong bad dawa naka sorkar Meghalaya ban shimkhia halor kane namar ki kyntien ba kren une u CEM ki pynmong bad pynjah burom iaki paidbah bad ka jylla Meghalaya baroh kawei.
“Kane ka jingkren u CEM ka Karbi Anlong District Council ka pyni ba u kwah ban wanrah ka jingiapher jait bynriew hapeng ki Khasi-Jaintia bad ki Karbi kiba sah haki thain khappud ka Meghalaya bad Assam” la ong u bah Tyllang.
U bah Tyllang u la ong ba kane ka jingshah khein nong buhai shnong beain iaki para doh para snam kata ki Khasi-Jaintia ha ki briew ba ju donkti ban kyntur pud sha Meghalaya kan wanrah iaka jingiaumsnam hapeng ki Khasi bad Karbi bad dei namar kane ka sorkar jylla ruh kadei ban shimkhia ban iakren bad ka sorkar Assam.
U la ong ba ka sorkar Meghalaya kadei ban khot iakren mardor iaka sorkar Assam ha ka kingdon lang u CEM ka Karbi Anlong District Council u Tuliram Ronghang bad kadei pan jingpynshai iaka jingkren bein u CEM iaki Khasi-Jaintia ba sah ha ki thain Mukroh.
“Ka sorkar kadei ban shimkhia bad kadei ban pynbeit ia kane ka jingshah kren bein ki Khasi-Jaintia lym kumta ka seng kan lum iaki dkhot ban pahara hi ia u pud u sam wat lada hap rah tiar ialeh naka bynta ka bha ka miat ki paidbah ba shong ba sah ha ki thain khappud” la ong u bah Tyllang.
Nalor kane u vice president ka HANM u bah Tyllang Thongni u la ong ba ka seng kan pyrshah jur iaka jingthmu ka Karbi Anlong District Council ban tei mot jong u police ka Assam Forest u ba khlad haka jingjia haka 22 tarik mynta u bnai bad kan pyrshah ruh iaka jingthmu ban tei ing skul hapoh u pud u sam hapoh ka shnong Mukroh ka ba dang hap ha Meghalaya.
