Shillong, Jylliew 30: U National Vice President ka NPP bad Symbud Myntri Rangbah ka Jylla Bah Prestone Tynsong hynne ka sngi palei, ula ther kylla ia u National General Secretary ka AITC Abhishek Banerjee halor ka jingkynnoh pyrshah ia ka Sorkar MDA bad ia u Myntri Rangbah ka Jylla da kaba ong “Une u Nongialam ka AITC ula pyni ia ka jinglong Khynnah rit”.
Haba iakren bad ki nongthoh khubor,u Bah Prestone ula ong “Ka jingkren u Abhishek ka pyni ia ka jinglong khynnah rit kat u Nongialam ka AITC. U Abhishek shuwa ban pynmih ia kine ki jingkynnoh ba khlem sakhi ia kino kino ki Nongialam ka Jylla khamtam ki khliehduh ka Jylla, u donkam ban hap pyrkhat shispah sien”.
U Bah Prestone ula ong ba u National General Secretary ka AITC u dei ban wan sha Nongbah Shillong man ka por khnang ba ki Nongialam ka Jylla kin iarap ia u da ka jingai jinghikai kumno ba un kren paidbah.
“Ka long kaba bynniaw, hynrei u Banerjee un hap ban shim ia ki jinghikai kumno ban jam shakhmat ia ka lynti ha ka ban ai ka jingshakri ia ki paid nongshongshnong jong ka ri jong ngi” ula ong.
Halor ka jingkynnoh u Abhishek halor ka kam iapynbeit pud ka Assam-Meghalaya, u Bah Prestone ula ong ba kane ka dei ka kam ba jwat bad bala sahteng bha jong ka Jylla bad u Abhishek uba dang shu wan iuhkjat myn ha ka sngi balang ha Jylla, um don hok satia ban kynthoh ia kum kane ka kam ba jyrwit jyrwat ka Jylla.
“Ka long kaba sngewsih baka AITC ka pyrshang ban leh politics ia ka kam pynbeit pud. Ngi la shong jingialang haduh 11 ne 12 sien bad dep shong bishar bha ruh ia kiei kiei baroh hashuwa ban poi sha ka jingiasoi ia ka MoU. Ban shu kynthoh kumne ka long ka kam khynnah bad kaba bakla shibun” ula ong.
