Shah shoh sa 5 ngut ki bar jylla ha Jaiaw
Shillong, Jylliew 30: U Director General of Police (DGP) Dr Lajja Ram Bishnoi hynne ka sngi palei, ula kyntu ia ki samla trai Jylla ba kin burom lang ia ki briew kiba Jaidbynriew bapher bapher bad ban kiar ha kaban shim ia ka ain hala ka jong ka kti.
Kane ka jingkyntu kala mih hadien ba ki Pulit kila kem ia 11 ngut ki samla kiba donkti ha ki kam thombor ba dang shen ha Nongbah Shillong.
Ha ka janmiet sngi balang, sa 5 ngut ki bar jylla kila shah shoh ha ka thain Jaiaw, Umpohliew katba ki dang wan phai na ka jingbylla shna tile ha kawei ka Iing ha Jaiaw kynthup uwei u nongniah taxi kamai.
“Haduh mynta, ngi la kem haduh 11 ngut ki runar hadien ba ngi ioh jingtip ia ka jing shah thombor ki bar jylla khamtam ha ki thain Mawlai bad Jaiaw jong ka Nongbah Shillong” ong u Bishnoi haba iakren bad ki nongthoh khubor.
“Ka jingkyrpad jong nga ia baroh ki samla ka Nongbah ba long ba kin burom lang ia kiwei ki Jaidbynriew bad ban nym shim ia ka ain hala ka jong ka kti. Lada ki don kano kano ka jingeh, ki dei ban mih shakhmat, iasyllok bad ngi bad ngi ruh ngin iarap ia ki namar ka jingthombor ia ki bar jylla kan pynjah burom ia ka Tnad Pulit” ula ong.
U Superintendent of Police ka East Khasi Hills Bah Sylvester Nongtnger u pyntip ba ki 4 ngut ki nongbylla kila mynsaw jur na ka jingshah tied da u tyrnem ha kane ka jingjia ba jia ha Umpohliew.
“Ki Nongialam ka VDP kila leit mardor ban tuklar ia kane ka jingjia bad hadien ka jingbehthong, kila ioh kem ia uwei u runar ha lynti ban leit sha Phudmuri, Madan Heh” ong u Superintendent of Police ka East Khasi Hills ha ka kyrwoh.
Halor ka jingioh jingtip na ki bor Shnong, ki Pulit kila mareh pynsted sha kane ka jaka bad nyngkong eh kila shimti ia ki briew ba shah shoh bad pynkit sha Civil Hospital ban ioh ai jingsumar. Napdeng kine, uwei ula mynsaw jur bad la pynthiah ha kane ka hospital.’
Hadien kane, ki Pulit da ka jingiarap ki bor shnong kila ioh ban kem sa 5 ngut bad lai ngut ki dei kiba dang khynnah, ula ong haba pyntip ba ki Pulit kila register case ia kine ki briew hapoh ka Lumdiengjri Police Station.
U SP ula pyntip ruh ba kine ki briew ki dei ruh naka kynhun jong ki nongniah thuk thuk kiba donkti ha ka jingshoh ia u Pulit pyniaid kali, u nongkit tiar swiggy bad ki samla pule na Kerela kaba jia ha ka 24 tarik Jylliew.
Ha kane kajuh ka miet, ki Pulit kila ioh ban kem sa uwei u runar uba donkti ha ka jingjia ba jia ha ka 24 tarik Jylliew, kaba pynkot ia ka jingdon ki briew bala kem sah ka 11 ngut. U pyntip ba ki Pulit ka District ki dang thwet jur ban iohkem sa ia kiwei pat ki briew ba donkti.
