Shillong, Nailar 23 : U National General Secretary ka NPP bad Symbud Myntri Rangbah ka Jylla Bah Sniawbhalang Dhar ha ka sngi Thohdieng, ula ther tyngeh ia u President ka Congress Bah Vincent H Pala halor ka jingkynnoh ba u dei u Nongaiktien ka BJP-RSS bad bthah ruh ia u ban bishar bniah bad wad ia ki daw ha lyndet ka jingphet ki MLA hapoh ka jingialam jong u.
Haba pynphai kylla ia u Bah Pala, u Bah Sniawbhalang ula ong ba baroh ki top ba kane ka jingkynnoh pyrshah ia nga ka dei kaba bakla baroh.
“Nga dei u General Secretary ka NPP kumno la pyniadei ia nga bad ka BJP?, hooid, ngi iatreilang bad ka BJP ha kine ki 7 snem bala leit noh na ka bynta ka roi ka par. Ka Meghalaya kum ka Jylla kaba rit, ngi donkam ia ka jingkyrshan jong ka Sorkar Pdeng na ka bynta ka roi ka par. Kane ka dei ka jingmut jong ka Sorkar MDA. Kam dei ba mut tang namar ba ngi iatreilang bad ka BJP, ngi dei ki nongaiktien ka BJP lane RSS. Kane ka dei kaba bakla bad ka jingkynnoh ba khlem nongrim” ula ong haba iakren bad ki nongthoh khubor.
“Nga ju burom ia u Bah Pala kum u MP barim bad ruh kum u President ka MPCC. Ngim poi pyrkhat ba u Nongialam kum ba u, ban kren ia kum kine ki jingkren khynnah” ong u Bah Sniawbha bad bynrap “U tip ba ka Longiing jong nga ka wan na ka jingtreikam lajong sha ka jylli sain pyrthei ym na ka kam sain pyrthei sha ka treikam lajong. Baroh kitip ba ngi dei ka kompani construction, kumta ka jingkynnoh bamsap kaba mih na ki kam droks,ki dei kiba bakla palat”.
Haba kyntu ia u Bah Pala ban shong bishar bha, une u Nongialam ka NPP ula ong “Ka khyllipmat ba u shimti kum u President ka MPCC, mar mar haduh 12 ngut ki MLA kila leit iasoh sha ka TMC. Hato phin kynoh ia u Sniawbhalang halor kane? Hadien wan sa ka elekshon 2023, ka kong Ampareen, Kimfa bad Rapsang kila iasoh sha ka NPP. Hato phi mut ban ong ba dei ba nga ba khot ia ki ban iasoh sha ka NPP?. Katba u Bah PT Sawkmie bad Mayralborn kila leit ban iasoh sha ka UDP. Kane ka pyni ba u Bah Pala um lah pyniaid iala ka jong ka Iing. Bad dangshen, laingut ki MLA ka Congress ruh kila wan iasoh sha ka NPP. Kumta, u dei ban shong bishar ialade bad wad ia kaei kaba iaid bakla hala ka jong ka Iing. Ban shu kynnoh ia ka NPP ba ki MLA ka Congress ki wan iasoh ka dei ka bym iahap satia. Ngi pdiang lut iano iano ruh kiba wan ban iasoh”.
U bah Sniawbha ula kop ruh ia u Bah Pala ban pynshisha ia ki jingkynnoh ba ka Dhar Company ka leh ia ki kam beain.
“Ban ong ba ka kompani jong nga ka don hapoh ka jingpeit pyrman ka CBI, ngi tip ba kam don satia kaba kut kata. Sngewsuh,ba kum u MP barim ban ong ba ka kompani kaladonkti ha ki kam khaii droks, nga sngew ba kum ki nongialam ngi dei ban iasnohkti lang ban iakhuh pyrshah ia u droks bad ratdyngkhong ia u na Jylla. Nga sngew ba ki jingkynnoh ba khlem nongrim ka dei ka bym lah satia ban pdiang” ula ong.
