Shillong, Nailar 23 : U Myntri ka Tnad Housing Marcuise N Marak ha ka sngi Thohdieng, ula wanrah ia ka Meghalaya State Housing Board Repealing Bill, 2024.
Haba wanrah ia ka statement of objects and reason, u Marak ula ong ba ka Meghalaya State Housing Board Act, 1986 (Meghalaya Act No 6 of 1986) la pynlong ain ban lah pynkha ia ka State Housing Board na ka bynta ban pynroi ia ka jingshna iing ha Meghalaya.
U ong ba kane ka Ain kala treikam la palat 30 snem bad wat hapdeng ki jingthmu jong ka, kala pulom ban kynjoh sha ka thong namar kiba bun ki daw, kynthup ka jingbym biang ka jingioh song pisa, ka jingbym lah ban leh eiei halor ka jingkiew ka jingdonkam iing ki briew ha Meghalaya, ka jingbym biang ka rukom pyniaid ia ka Board, ka jingbym shai bad khuidha ka jingtreikam bad kiwei kiwei.
U pyntip ba u Myntri Rangbah barim ha ka jingialang ba ula pynlong ha ka 4 tarik Nohprah, 2014, ula rai ban khang tala noh ia ka Board bad ula pynmih ia ki jingbthah halor kane.
U Accountant General ula buh jingkylli halor ka jingiai beng ban don kane ka Board ka bym treikam wat hapdeng ka jing bthah jong ka PAC naduh u snem 2017.
