Ba kynthoh ia u MP ba lapmiet bam sohot ha Parliament
Shillong, Rymphang 28 : U Nongialam ka Meghalaya Pradesh Congress Committee (MPCC) bad Congress Legislature Party (CLP) Bah Ronnie V Lyngdoh ha ka sngi Balang, ula ther kylla ia u MLA ka BJP na South Constituency Bah Sanbor Shullai namar ka jingkynnoh ba um ju kren eiei hapoh ka Iingdorbar Thaw Ain ka Jylla.
Ula kynthoh ia kane halor ka jingkynnoh u Bah Sanbor ba u MP ka Congress na Shillong bah Vincent H Pala, u khlem leh eiei na ka bynta ka constituency bad u “pynlut por da kaba bam sohot mynta la san snem ha Parliament”.
“Wad ma phi katno sien u bah Sanbor Shullai u Ju wan sha Iingdorbar Thaw Ain. Katno sien ula ju kren hapoh ka Iingdorbar Thaw Ain?” ong u Bah Ronnie haba iakren bad ki nongthoh khubor.
“Halor (ka jingtreikam) u Bah Pala, nga tharai shibun ki kam ba ula leh. U dei u briew ba jar jar. Um ju kwah pynmih kot khubor kum ki katto katne ki politician. Shibun ki kam ba ula leh na ka bynta jong ngi bad nga tharai ki don shibun ki project kiba la pyntrei hapoh ka Jylla namar ka jingshimkhia jong u” ula ong.
“Hynrei ka jingkynnoh u bah Sanbor kam don jingmut satia namar ialade um ju kren hapoh ka Iingdorbar bad niar eh ba un wan sha Iingdorbar. Hato phi la ju iohkren ba u kren hapoh ka Iingdorbar?. U shu wan sha Iingdorbar bad ym ju kren eiei bad lehse kan bha ia u ba un shu shong ha Iing” ula bynrap.
U bah Ronnie ula ong imat u bah Sanbor um ju peit ia ki jingiakren ha Parliament ha kaba u Bah Vincent ula iashimbynta ha ki jingiakren hapoh ka Iingdorbar bad rah ruh ia shibun ki ishu kiba dei jong ka Jylla Meghalaya.
Halor ka jingkynnoh ba u Bah Vincent u khlem lah pynlong ia ka jingialang jong ka DISHA hapoh ka constituency, u Bah Ronnie ula ong ba dei ban sngewthuh ba ha kine ki 2-3 snem bala leit noh, ka khlam Covid kala don bad hadien kane, ka Sorkar India ruh ka khlem pyllait ia ki skhim. Ula ai nuksa baa ka mang pisa jong ka MGNREGA bad ki kam pynroi sha Nongkyndong ruh la pynduh.
“Mynta ban shu pynlong ia ka jingialang khlem da don eiei ban iakren, kam don jingmut eiei ruh em” ula ong.
