Shillong, Nohprah 27 : Ka All India Trinamool Congress (AITC) kaba don ha ka Liang Pyrshah, hynnin ka sngi nyngkong, kala ther tyngeh ia ka Sorkar Assam ba ialam daka Bharatiya Janata Party (BJP) namar ka hukum ban tohkit ia ka jingdon ki Iingmane Khristan ba dang shu mih thymmai bad ruh ka jingpynkylla niam haba ong ba kum kane ka jingpeitngor ka dei kaba la jia ruh mynta ha Jylla Meghalaya.
Haba kren sha ki lad pathai khubor, ki Vice President ka AITC Bah George B Lyngdoh bad James Lyngdoh, kila dawa ia ka jubab balei ba ka Sorkar Assam ka pan ia kum kine ki jingtip. Kila ong ruh ba kane dei ka jingpyrshang ban iuhroit ia ki briew bad pynthut ia ka jinglehkmen Khristmas.
Kane ka kam ka iadei bad ka shithi na ka Special Branch ka Tnad Pulit ka Assam ba pan ia ki jingtip ba bniah halor ka jingdon ki Iingmane ba dang shu seng thymmai ha une u snem bala lah, ka jingdon jong ki iingmane baroh, ki kam ba iadei bad ka jingpynkylla niam ha kine ki hynriew snem bad ki briew ba donkti ha ki jingpynkylla niam ia ki briew hashuwa ka 22 tarik u Nohprah.
“Ngi dawa ia ka jubab balei ba la hukum kynsan kynsan ia kum kane ka jingtphkit halor ka jing don ki iingmane ha Assam. Kane ka dei kawei pat ka jingpyrshang ban pyndkut ia u sai tyllai jong ka jingiaburom Niam hapoh ka Ri. Kane ka kam ka buh jingma ia ka jingsngain jong ki paid Khristan” kila ong.
Kine ki Vice President kila ong ba ia kum kine ki juh ki kam la ioh khubor ruh ba kila jia hapoh ka Jylla Meghalaya.
“Kum ia kine ki kam beain la leh ruh ha Meghalaya. Ngi la ioh jingtip na ki briew b aka Intelligence Bureau ka dang buddien bha ia ki kam jong ki Khristan hangne ha Jylla” ong u Bah George.
Haba kynthoh ia ka jingkam u Myntri Rangbah ka Jylla ba um don jingtip ia kane ka hukum ba pynmih da ki Pulit, une u MLA ka Umroi ula ong ba kane ka dei tang ban shu pynbiej ia ki paidbah. Ula ban ruh ba ka Jylla Assam ka dei ka Jylla ba jyllei eh ki kam thombor pyrshah ia ka niam ha ka thain Shatei Lam Mihngi, kaba la nang kiew arsut naduh u 2020.
