Shillong, Nohprah 27 : U MLA barim ka South Tura John Leslee K Sangma, ula iehnohkam na ka Bharatiya Janata Party (BJP) haba kdew ba ka daw ka dei namar ba ym don ba pdiang ia u da ka Party ha ka District.
“Nga…buh hangne ia ka shithi iehnohkam na ka party naba ka jingrung jong nga sha ka party bad ka jingpynlong dkhot ia nga ha ka BJP ka dei ka bym pdiang bad ithuh ha ka District Level kaba nga dei ban treikam na ka bynta ka party” ong u John Leslee ha ka shithi bala phah sha u President Bah Ernest Mawrie myn ha ka 20 tarik Nohprah.
Une u MLA barim ula rung sha ka BJP ha ka 29 tarik Jylliew ha ka jingiadon ryngkat ki arngut ki MLA kata Bah Sanbor Shullai (Myntri) bad Bah AL Hek nalor kiwei kiwei ki nongkitkam ka Jylla.
U John Leslee ula ong ba ula rung sha ka BJP da ka jingngeit bad baroh ki dkhot kin ai ka lad ia u ban shakri ia ka party ban wanrah ia ka roi ka par ha ka thain bad ban ailad kynjuh ia baroh ki dkhot.
“Hynrei, kam shym long satia kumta bad la mih pynban kaei kaei kaba pynbor ia nga ban nym iatreikam lang shuh ha ka party. Nga aiti ia kane ka shithi iengnohkam na ka BJP kaba treikam naduh ka 20 tarik Nohprah” ula ong ha ka shithi.
U John Leslee un mih aireng ia ka elekshon MLA 2023 pyrshah ia u Myntri Rangbah ka Jylla Conrad K Sangma, uba mihkhmat na South Tura Constituency bad kumjuh ruh ia u Vice President ka BJP-Meghalaya uba dei u MDC Bernard N Marak.
