Shillong, Risaw 17 : Ka Meghalaya Pradesh Congress Committee (MPCC) hynne ka sngi nyngkong, kala pynlong ia ka jingiathep vote ban jied ia u President ba thymmai jong ka All India Congress Committee (AICC) ne ka Congress hapoh ka Ri.
Ia kane ka jingiathep vote la pynlong ha Congress Bhavan, Shillong bad haduh 56 ngut ki Nongmihkhmat kiba mihkhmat na ki Block kila iathep ia ki vote naduh ka por 10 baje mynstep haduh 4 baje janmiet.
Ka jingiakhun ia kane ka shuki President ba thymmai jong ka Congress party ka long hapdeng u Mallikarjun Kharge bad u Shashi Tharoor.
U President ka MPCC ma Vincent H Pala haba iakren bad ki nongthoh khubor, ula ong ba kine ki nongthep vote ki dei kiba mihkhmat na la ki jong ki Block ka Congress.
U ma Vincent u pyntip ba ka jingia niew ia ki vote kan long ha Head Office jong ka AICC, New Delhi, ha ka sngi balang ban wan.
U President ba thymmai ka Congress kin hap ban trei ha kaban pynkhie im biang ia kane ka Party kaba la rim tam hapoh ka Ri India.
Ka AICC kala dep ai ia ki Identity Card kaba don ia ki barcode sha kito kiba dei ki Nongthep Vote ha kane ka elekshon.
Ki Nongthep vote kin ioh ban thep ia ki vote jong ki hadien ba jingpyni ia ki identity card bad kiwei kiwei ki jingpynithuh.
Ka AICC kala pynkhreh ban thaw ia ka histori da ka jingjied ia u President ba thymmai ki bym dei satia na ka longiing ki Gandhi, mynta la palat 24 snem.
