Nongstoin, Rymphang 06 : Hynniew ngut ki kyrtong kila thep kyrteng hynne ka sngi nyngkong ban iakhun ia ka elekshon MLA-2023 ka ban long ha ka 27 tarik mynta u bnai.
Kine ki hynriew ngut ki dei u President ka HSPSP Bah KP Pangniang ( Rambrai-Jyrngam), Bah Methodius Dkhar kyrtong ka HSPDP (Mawshynrut), u San Banjied Kynsai Shangrit kyrtong ka HSPDP (Nongstoin), Justine G Momin n aka AITC (Mawshynrut), Francis Pondit kum u kyrtong shimet (Rambrai-Jyrngam), u Bah Bobby Kharshandi kyrtong ka VPP ( Nongstoin) bad u Bah Diostar Jyndiang kyrtong ka BJP ( Nongstoin).
U kyrtong ka HSPDP Nongstoiñ Bah Sanjied Kynsai Shangrit u la ong ba ka thong hi ka long ban wanrah ïa ka rukom synshar khaddar kaba khuid ba suba, ka synshar khaddar ka bym noh tarajur lada dei ïa u rit ne u khraw, lane ïa u riewspah bad u ba duk.
U la ong ba lada ki paidbah ki jied ki mon ïa u ban mihkhmat, ka dei ka kamram jong u ban peit ba ki samla kim dei shuh ban ïa ap tang ka kam sorkar. Hynrei, ban phai sha kiwei de ki lad ki lynti kamai, kata kum ka kam jngohkai pyrthei bad kiwei.
U Bah Methodios Dkhar kyrtong na Mawshynrut u la ong ba um shym ieng ban ïakhun kyrpang ïano ïano hynrei u ieng halor ka nongrim lyngba ki paidbah kiba don syndah bad ka party HSPDP.
U President ka HSPDP bah K.P Pangniang, u la ong ba ka jingmih jong u ban mih ïaleh biang ïa ka elekshon ka dei ka jingdawa jong ka Constituency, ka jingdawa jong ka party, ka ri bad ka jaidbynriew.
U la ong ruh ba watla ka HSPDP ka la don ha ka sorkar MDA, hynrei sngewsih ba ïa ka ishu jong ka party kaba ka la ïai tynruh man ka por lyngba kane ka sorkar, kam shym la poi sha ka jingpynkut. Wat ka wat ba nyngkong jong ka jingpynbeit pud ruh dang leh tang khyndiat. Hynrei, ïa ka Langpih lei lei kaba dei ka bynta ba kongsan tam, ym pat shym la lah satia wat tang ban ktah khyndïat ruh. Kaba mut ba ka kam pynbeit pud hi kam shym pat poi sha ka thong.
U kyrtong shimet na Rambrai Bah Francis Pondit Sangma u la ong ba kumba long mynta hi, jan baroh ki nongkyrshan na ki paidbah Garo ki kwah ïa u ba un jop beit ïa kane ka elekshon, namar ki kwah ba un ai ka jingshakri kaba khambha na ka bynta jong ki.
U Bah D.Jyndiang na ka party BJP u la ong ba bun na ki skhim dei hi kiba la wanrah beit na central ban pyntreikam hapoh ka jylla. Hynrei ka jylla ka shu ap beit katba phah na Delhi. U la ong ruh ba ka party na Nongstoiñ ka la pyrshang ban ai jingmut sha ka state level halor ki 9 tylli ki mat kiba kongsan na ka bynta ka ri bad ka jaidbynriew. Nalor nangta u la ong ruh ba ha ka jingïadei bad ka jingngeit niam, ka BJP hi ka ai laitluid sha baroh ban mane Blei katkum ka jingmon jong ki nongshong shnong.
U Bah Bobby Kharshandi kyrtong party Voice of the Peoples Party, u la ong ba ka jingangnud ka long ban wanrah ïa kata ka synshar kaba khuid, ka jingsynshar kaba ym noh shilliang shano shano hynrei kaba ai jinghun sha baroh ki paidbah, kata la ka long ha Nongstoiñ Constituency ne wat ha ka jylla hi baroh kawei.
