Shillong, Rymphang 06: U Myntri ka sorkar pdeng ba khmih iaka tnat Earth Sciences u Jitendra Singh hynne ka sngi ula kam ba ka jylla Meghalaya bad ka thain shathei lam mihngi baroh kawei kala kylla dur naduh ba shimti u Nenrendra Modi kum u myntri rangbahduh ka ri India.
Haba kren sha ki lad pathai khubor hadien ba wan synran thep kyrteng u bah A.L Hek, u Jitendra Singh ula ong ba kum u nongialam ka Bharatiya Janata Party (BJP) u kyrmen bha ba ka BJP ha kane ka ilekshon kan ioh khur jingjop kham bun ban ia nujor ha ka ilekshon 2018.
U Jitendra ula ong ba ula thikna ba ha kane ka ilekshon ka BJP kan ioh ban thaw sorkar namar ki paidbah ka Meghalaya kila sngewthuh iaka jingdonkam ban don daka Sorkar double engine kata ka sorkar BJP ha Delhi bad ka Sorkar BJP ha Meghalaya naka bynta ban pynbun ki kam pynroi hapoh ka jylla.
“Nga la thikna ba ka BJP mynta ka ilekshon kan thaw sorkar marwei namar ki paidbah kila iohi iaki kam ba ka BJP haka jingialam u Myntri Rangbahduh ka ri u Narendra Modi ka la leh ym tang ha Meghalaya hynrei ha baroh kawei ka ri India” la ong u Jitendra.
U Jitendra ula kam ba naduh ba shimti u Narendra Modi kum u Myntri Rangbahduh ka ri ha u snem 2014, ki kam pynroi kum ka jingdon ki kad Lengsuin, ki Rel bad kiwei kiwei de ki kam pynroi kila kham bun hapoh ka thain Shathei Lam Mihngi.
Ula kam ba Modi ula wan iuh kjat bun sien ha Meghalaya bad kane ka jingwan jong u kadei naka bynta ban pynthikna ba ki kam pynroi ki poi sha ki kyndong kynshrot ka jylla namar ka thong jong ka BJP kadei hi naka bynta ka bha ka miat ki paidbah bad ka jylla baroh kawei.
Shuh shuh ula bynrap ba hadien 2014 ka jylla Meghalaya ruh kala sdang kiew bha namar ka BJP kala shim khia ban kyntiew iaka ioh ka kot jong ka jylla bad dei namar kane, ki kompeni ba heh na kiwei ki jylla kila wan poi sha Meghalaya naka bynta ban aikam iaki samla ka jylla.
“Hashuwa 2014, ka Meghalaya kala paw kum ka jylla ba jur bha ka bamsap hynrei haduh ka jingwan iuh kjat, u Modi ka Meghalaya kala paw kum ka jylla ba ban bud nuksa haka roi ka par” la ong u Jitendra.
