Nongpoh, Nailur 08: Ka Balang Presbyterian-Umroi District, hynne ka sngi Thohdieng, kala theh ia ki symbai dohkha ba kot haduh 40 kilo hapoh ka Wah Kyrwa kaba hap hapoh u pud u sam ka Shnong Umroi, ban lah pynkharoi biang ia ki dohkha dohpnat ha kane ka wah.
Kane ka Balang kaba hap hapoh ka Mawbuh Presbytery, kala shim ia kane ka sienjam lyngba ka Rural Social Economic & Life Development Committee, kaba iohi ia ka jingdonkam ban pynim biang ia ki wah da ki jingthaw ba im.
Kiba bun ki wah ha Ri-lum Khasi khamtam ha Ri-Bhoi District, kila don ha tmier ka jingkylla long ki wah kiba iap namar bala jan duhjait lut ki dohkha dohpnat da ka jingdoh ki riew rhah bam duh, kiba pyniap pathar ia ki dohkha dohpnat da ki dawai bih, ki bomb, ki jar bad ter ter.
Ka Balang Presbyterian-Umroi District kum ka sienjam ban pynphriang ia ka khubor halor ka jingdonkam ban pynneh pynsah bad burom ia ka mei mariang kum kawei ka kam Shakri Blei, kala pynlong ia kane ka jingtheh symbai dohkha ha kane ka Wah Shnong ban pynkha roi pat ia ki ha kane ka Wah.
Ha kane ka sngi, la ia donlang da u Bah O. Kharpuri, u ba dei u Beat Officer ka Soil & Water Conservation, Umroi Beat House lem ki dkhot ka Komiti ba kynthup ia u Rev. E.R Kharkrang, pastor rangbah ka KJP Synod Sepngi, u Bah P.B Sylliang, Chairman ka Dorbar Shnong Umroi Pyllun, u Bah Shalan Sylliang, Secretary katei ka Committee, u Bah Kynsai Nengnong, Secretary ka Dorbar Umroi Pyllun bad kiwei kiwei ki nongialam shnong bad na katei ka Committee.
Kane ka Komiti ka la ioh ban thep kumba 40 kilo ki symbai dohkha ha ka wah kaba la tip kum ka Wah Kyrwa ba hap hapoh u u pud u sam ka Dorbar Shnong Umroi Pyllun.
Na ka liang u wei na ki nongialam jong kane ka Komiti, ula pynpaw ia ka jingkmen kaba khraw ban ioh ia kum kane ka lad ban leh ia ki kam babha ha ka imlang ka sahlang khamtam ban shim ia ka sieñjam ban pynneh pynsah ia ki dohum dohwah kaba long ruh kum kawei ka nuksa babha na ka bynta kiwei pat ban sngewthuh ia ka jingkordor jong ka mei mariang.
