Shillong, Nailur 11: Ki Rangbah Shnong ka thain Umsning, kiba don hapoh ka lama jong ka Synjuk ki Rangbah Shnong Ri-Bhoi lem bad ki kynhun Sengbhalang, hynnin ka sngi saitjain, kila thaw ia ka Joint Action Committee ban ieng pyrshah ia ka jingkynnoh thmu aiwai noh ka Sorkar Jylla ia ka shnat MeECL Umsning Division sha ki kompani shimet.
Ki Rangbah Shnong kynthup ki Sengbhalang naduh ka seng KSU, HNYF bad kiwei kiwei, kila thaw ia ka JAC ha ka jingialang bala pynlong kyrkieh ha ka Iingdorbar jong ka Shnong Umsning Patarim.
Ki Rangbah Shnong kila pynpaw ia ka jingpyrshah kaba jur bad byrngem ruh ban iakhih da kaba tyngeh lada ka Sorkar ka aiwai ia ka shnat treikam ka MeECL Umsning Division sha ki kompani shimet.
Kiba la iadonlang ha kane ka jingialang ki kynthup ia ki nongïalam ka Synjuk ki Rangbah Shnong kata u Bah BB Makdoh Chairman, Bah PB Sylliang Secretary, Samla Ferdinald Kharkamni President ka KSU North Khasi Hills District, Bah Marcus Marten President ka HNYF Northern Region nalor kiwei ki riew rangbah bad nongïalam shnong.
Haba kren sha ki lad pathai khubor,u Bah BB Makdoh u la ong ba kum ki nongïalam Shnong ki dap da ka jingsngewkhia kaba jur halor ka jingthmu Jong ka sorkar ban lilam lut ïaka tnad MeECL kaba la thmu naduh ki por ba mynshuwa hynrei mynta ka sorkar kala sdang pyniaid ia ka kam.
“Ngi pyrshah jur ia kane ka jingthmu namar khlem pep kan sa leh kumjuh sha ka thaiñ Nongpoh, Byrnihat bad kiwei kiwei ki jaka watla ki paidbah ki siew thikna ïaka bai bording” ong u Bah Makdoh.
Kat kum ka jingong jing u, ka jingaiwai noh ia ki shnat treikam ka MeECL kan sa ktah jur ia ki paidbah ka thain bad khlem pep ki paidbah ruh kin sa mad ia shibun ki jingeh, ki jinglehmon bad ka jingthombor da kine ki kompani shimet haba phai sha ka jingsam bording bad ka rukom siew ia ka bai bording.
U President ka KSU-NKH Samla Ferdinald Kharkamni u la ong ba naka liang ki kynhun sengbhalang kin ai ka jingkyrshan ba pura ïaki Rangbah Shnong ban pyrshah ia katei ka jingthmu jong ka sorkar.
“Ka sorkar ka dei ban weng bad ban pynneh kumjuh ïaka rukom sam ïaka bording, bad lada ka sorkar kam sngap naka liang jong ka KSU, ryngkat bad ki Rangbah Shnong kila pynkhreh da ki jingïakhih ba tyngeh” ula maham.
Ha kane ka sngi, ka JAC kala rai ba kan sa leit ban ai da ka jingthoh sha u Myntri ka tnad bording bad kumjuh ruh sha u Chief Engineer ban weng noh mardor ïa katei ka jingthmu aiwai ïa ka tnad MeECL sha ka kompani shimet.
