Shillong Nailar 10: Ki khlieh jong ki 10 tylli ki Autonomous District Council ka Thaiñ Shatei Lam Mihngi kila iakynduh lang hynne ka sngi Saitjaiñ ha nongbah Shillong bad kila shim ia ka rai ban thaw iaka Komiti ban buddien halor ki mat jingdawa kaba kila dawa na ka sorkar pdeng ban pynkylla ia ki kyndon jong ka Sixth Schedule jong ka riti synshar ka ri.
U CEM ka KHADC u Bah Pyniaid Sing Syiem ula ong, baroh 10 tylli ki Autonomous District Council kila leit iakynduh ia u Myntri Kam Pohiing ka ri u Amit Shah ha Delhi bad ula ai ka jingkular ba hapoh shi bnai yn pyndep noh ia kane ka kam ha kaba kan don ka komiti kaban pyndep pura noh iaki jingdawa jong ki District Councul hashwa ban rah sha Parliament.
Ula pynpaw ruh ba ki don iaka jingkhmih lynti ba ka sorkar pdeng kan sa rah ia katei ka jingpynkylla iaka Sixth Schedule jong ka riti synshar ka ri ha kaDorbar Tlang jong ka Parliament na ka bynta ban ioh ia ka jingmynjur.
“Ngi la rai ba ngin leit ban iakynduh ia u Myntri Kam Pohiing ka ri bad ia ki ophisar ka sorkar pdeng ban buddien bad ban ia pynbeit ha kaba iadei bad ka dorkhas kaba kila phah” ong u CEM ka KHADC.
U Bah Pyniaid ula ong, ba ka jingialang kala shim ia ka rai ban don ia kawei ka Committee kaba thymmai na ka bynta ban don ia ka jingiatylli jong ki 10 tylli ki Autonomous District Council ha ka thain shatei lam mihngi.
“Ia kane ka Committee ngim pat ai kyrteng, hynrei la shaniah ha ki nongialam kiba mynta ba kin sa pynbna ia ka kyrteng bad la thung ia u Pradyot Deb Berma bad u E Teron kum ki nongaibuit, u Chief Convenor u Bah PS Syiem, Convenor u M Laiko bad u Pramod Boro” ong u Bah Pyniaid bad ka bynrap ba ki don 10 ngut ki dkhot ha kane ka Committee, kiba kynthup ia u Ranjit Basumatry, H Larma, Telson, H Lamuanga, Avijit Kro,Thombor Shiwat, Rakesh Sangma, Samuel Changsa, TW Chyne bad u PC Jamatia.
“Kane ka kynhun jong ki 10 tylli ki District Council ka thain shatei lam mihngi jong ka ri, kan buddien ia ki kam kiba dang sah bad lada ka long ha kano kano ka rukom ruh, ngi lah iatylli bad ngi lah shim ia ka rai kaba skhem mynne ba ngi hap beit ban pynkynmaw bad ban pynsngew sha ka Sorkar India ba kan shim ia kane ka kam ban pyndep kham kloi” ong u Bah Syiem.
