Shillong, Naitung 21 : Ka sorkar jylla ka la thaw da ka Task Force na ka bynta ban peit kyrpang halor ka ishu bret jaboh ha Jowai kaba dei ka distrik headquarter jong ka West Jaintia Hills District.
Ia kane la pyntip ha ka Iing Bishar Meghalaya High Court ha ka por ka jingbishar ia ka PIL ba ujor da ka Synjuk Ki Waheh Chnong Jowai – kaba dei ka kynhun jong baroh ki Rangbah Shnong jong ka Jowai, ha kane ka sngi Balang.
Ha katei ka hukum, ka kynhun ki nongbishar ba arngut ki la ong ba la iohi ba ka sienjam ba shipor ba la shim na ka bynta ban weng ia ki jaboh jakhlia kiba lum thup ha nongbah Jowai bad ruh halor ka jingeh ba ki nongshong shnong ka Jowai ki mad ha ki khyndiat bnai ba la dep, kan ym wan jia shuh mynta.
Hynrei la katta ruh la kdew ruh ba katba katei ka sienjam ban iakhun haduh kaba kut ia katei ka ishu kam pat dep, ia kane ka jingujor ym pat dei ban pynkut noh.
Shuh shuh katei ka hukum ka ong ba ka sorkar jylla kala dep pynpaw ba ki sienjam ban iakhun haduh kaba kut ia katei ka ishu la dep ban wanrah bad la dep ruh ban thaw iaka task force ryngkat ki kyndon.
Na ka liang ka Jowai Municipal Board ruh ka kdew ba ka kam ka la iaid shakhmat na ka bynta ban lah ban pynkut ia katei ka jingeh.
Na ka liang ka Iing Bishar ka buh por biang hadien hynriew taiew ban bishar biang da ka jingkyrmen ban iohi ia ki sienjam kiba kham paka halor katei ka bynta.
