Shillong, Naitung 3: Ka Supreme Court ha ka Sngi Thohdieng kala kyntait ban pynsangeh ia ka jingai jamin ia ka Sonam Raghuvanshi, kaba la shah kynnoh donkti hakhmat eh ha ka jingpyniap ia la u kurim u Raja Raghuvanshi ha ka jingleit“Honeymoon’ sha Sohra ha u 2025.
Ka Division Bench kaba kynthupo ia u Justice MM Sundresh bad Sheel Nagu kala ong, ba ka don ia ka jingsngew ba hap ban bishar bha halor ka hukum kaba la pynmih da ka Meghalaya High Court ha ka 29 tarik u Jylliew hynrei kala kyntait pat ban suspon ia katei.
Ka Iingkashari kala pynpaw ba ka Sonam Raghuvanshi ka dei kaba lah dep ban lait da kaba ioh jamin bad ka sah hapoh Shillong kumba la bthah da ka iingkashari ha ki kyndon ai jamin.
U Nongiasaid Aiñ ne Solicitor General Tushar Mehta, uba mihkhmat ia ka sorkar Meghalaya, ula iasaid hapoh ka iingbishar ban pynsangeh shwa ia ka jingai jamin da kaba pynpaw ba ki jingkynnoh ki long kiba khia bha bad ba ka High Court kala shaniah ha ki bynta kiba iadei bad ka lain ‘Technical’ ban pyllait ia ka.
Ka iingkashari kam pat sngewhun ban ai ia kano kano ka hukum. Kala buh ban bishar biang ia ka jingkyrpad jong ka jylla hadien jong ka aiom lyiur.
Ka Sorkar Meghalaya kala mudui ha ka sngi Palei, hadien ba ka Meghalaya High Court kala pynksan ia ka hukum kaba la pynmih da ka Session Court ban ai jamin ia ka Sonam Raghuvanshi.
Ka Sonam Raghuvanshi, kaba shong ba sah ha Indore, kala shah kem ha u bnai Jylliew 2025 halor ka jingjia kaba iadei bad ka jingiap u kurim jongka u Raja Raghuvanshi, uba dei u nongkhaii.
Kine ki shi kurim kila jah ha ka jingleit kai sha Sohra ha ka 23 tarik u Jymmang 2025 bad ia ka metiap jong u Raja la lap na kawei ka jaka kaba long riat ha ka 2 tarik u Jylliew.
Katkum ka jingpynpaw jong ki pulit ka Meghalaya, la kynnoh ba ka Sonam kala iasuh buit bad thong ia ki nongpyniap briew ban pyniap ia u kurim jongka na ka bynta ban ioh ia ka spah.
