Shillong, Nohprah 20 : Ka Sorkar Jylla ha ka sngi Thohdieng, kala ai jingmynjur ban pynkha ia ka National Games Secretariat Society, ka kynhun treikam kaba la bynshet ban plan bad pyniaid ia ka 39th National Games, kaba lah buh ban pynlong da ka Meghalaya ha u snem 2027.
Haba kren sha ki lad pathai khubor hadien ba pyniaid ia ka jingialang ka kynhun Myntri, u Myntri Rangbah Conrad K Sangma ula ong “Ngi la rai ban pynkha, kaba ngi khot ka National Games Secretariat Society, bad ia kane la leh ban pyniaid ia ka 39th National Games ha Meghalaya”.
“Kane ka dei ka lynti kaba la bud da baroh ki Jylla, la leh ban pynthikna ba dei ban don ka kynhun ba treikam laitluid ka ban pyntreikam bad pynthikna ia ka jinglah pynlong ia ka Games kaba jop. Ka dei kum ka kynja shnat treikam ka Tnad Sports hi ha kaba u Chairperson un dei u Myntri kam ialehkai bad u member secretary bad kiwei ki dkhot kin dei ki Ophisar na ka Tnad Sports bad kiwei ki Tnad ka Sorkar Meghalaya”.
Ka Secretariat Society kan treikam hapoh ka jingkhmih jong u Myntri kam ialehkai, u ban shakri kum u Chairperson, katba ki heh Sorkar na ki Tnad bapher bapher kin long ki dkhot.
Ka 39th National Games, kaba la buh ban long ha u bnai Rymphang-Lber 2027, kala khring ia ka jingmut jingpyrkhat kum ka lympung kaba heh bha ha Meghalaya, ka ban iaid ryngkat bad ka jingrakhe ia ka jingdap 55 snem ka jingioh Jylla la ka jong.
