Thang ka KSU ia ka jubab ka MPSC | Yn dawa pynbeit janai ia ka rukom treikam ka Commission

Shillong, Nailar 01 : Ki Nongialam bad Dkhot ka Khasi Students’ Union (KSU) ha ka sngi Palei, kila thang ia ka jubab jong ka Meghalaya Public Service Commission (MPSC) ha ka jingiashong kyllain mungor ha phyllaw ka Commission, kum ka dak ban pyrshah ia ka jingbym lah ban leh eiei halor ki kynrum kynram kiba mih na ka jingthungkam ia ki MCS, MPS bad Statistical Officer ka Tnad Animal Husbandry& Veterinary.

Kane kala wan jia hadien ka jingkut noh ka jingaipor ba 48 kynta ia ka MPSC ba kan pyllait paidbah ia ki marks bala ioh da ki nongiakhun ia ka eksam jong ka Meghalaya Civil Service (Prelim), ban pynshai ia ka jingduna jong ki kyrtong ba shah jied ha ka Meghalaya Police Service ban leh Personal Interview bad ka jingthungkam ia arngut ki Statistical Officer ha ka jaka uwei kat kum ka jingpynbna laitkam ba pynmih ha u snem 2019.

Ki dkhot ka KSU kila pyrta slogan “Chairman MPSC step down, step down (hiar shuki)” nalor ki placard ba don ia ki jingthoh ba ong “MPSC is a house of blunders and misappropriations with no accountability. You are a mockery of the public service commission”, “MSPC is a hub of converting aspirations to desperations” bad “KSU will take a stand to ensure that nepotism and favouritism shall end.”

U Chairman ka KSU Employment Monitoring Cell Reuben Najiar ula pynbna ba ka Union kala kyntait war ia ki jingpynksan jong ka MPSC haba iashimbynta lang bad kiwei ki Nongialam bad Dkhot ka Umiam ban iatar bad iathang ia ki jubab bala ai da ka MPSC.

“Ngi kyntait ban pdiang ia ka jubab jong ka MPSC. Ha ka jingshisha, hadien ba ngi pule ia ka jubab jong ka MPSC, ngi la ngeit ba ka don ka jingleh bym hok ha ka jingthungkam. Kumta, ngin nym ailad ia ka MPSC ban khein sting ia ka kam kum ka jingpyrshang ban ialam bakla ia u paidbah. Ngin iai bteng ban iashong kyllain mungor tad haduh ba ka MPSC kala pyn treikam ia ki jingdawa jong ngi” ula ong.

Ka kynhun ki Nongialam ka KSU kila iakynduh ruh ia u Chairman jong ka MPSC halor ka jingkhot iakren jong u, ban ioh ban jur ia ki jingdawa ban don ka jingthungkam kaba shai bad kaba khuid.

Hadien ka jingialang, u samla Reuben ula ong “Ha ka jingiakynduh bad u (Chairman MPSC), ngi la dawa ba ka Commission ka dei ban pyllait paidbah mardor ia ki marks ba ioh da baroh ki nongiakhun ia ka eksam MCS. Halor kane, ka MPSC kala mynjur ia ki jingdawa jong ngi bad kular ba ia ki marks yn sa pyllait mynta ka janmiet”.

Lah ban kdew ba ka jingartatien ia ka jingleh hok ka MPSC kala mih hadien ba kala pynmih biang sa ia ka thup ki 62 ngut ki kyrtong, kiba la pynbna ba kila pass ia ka eksam MCS (prelim), ki ban ioh iakhun ia ka eksam main ban long ha u Nailur.

Haba iadei bad ka eksam MPS, une u Nongialam ka KSU ula ong ba ka seng kala buh jingkylli halor ka rai jong ka MPSC ban iaid lait na ka jingpynbna latkam ha kaban bud ia ka ratio ba 1:2:5 haba khot ia ki kyrtong sha ka personal interview.

“Ki (Commission) la khot tang khyndiat eh ki kyrtong (kumba 27 ngut) sha ka personal interview ha ka jaka ba ym duna ia ka 42 lane 43 ngut kat kum ka ratio 1:2:5” ula ong bad bynrap “Halor kane, u Chairman ka MPSC ula pan por naba u donkam ban iasyllok ia kane ka kam bad ki nongiasaid ain hashuwa ban iakren biang bad ka Seng. Hynrei, ngi la ban jur ba ki dei ban bud beit ia kaei kaba la pynbna ym ban iaid lait n aka”.

U samla Reuben ula pyntip “Haba iadei bad ka kam Statistical Officer, ka Union ka buh jingkylli ia ka rai jong ka Commission ban pynbna ia ka result na ka bynta ki arngut ki briew haba ka jingpynbna laitkam ka long tang kawei ka post-kata ruh tang ia ki Khasi-Jaintia category. Halor kane, ka MPSC kala kam ba kala don ka jingleh bakla ha katei ka por bad na ka Tnad kala phah ia ka shithi ba don artylli ki post. Kila pyni ia ngi ia ka shithi hynrei ngi la kdew ba kum kine ki jingleh bakla kim dei shuh ban jia”.

Haba banjur ia ka jingdonkam ban pynbeit janai ia ka rukom treikam ka MPSC, une u Nongialam ka KSU ula ong “Lad aka MPSC ka long kumba ka long mynta, kum kine ki jingjia kin nang iai jia beit na ka por sha ka por.

U pyntip ba ka KSU kala rai ba kan sa leit iakynduh ia ka Sorkar Jylla ha kine ki sngi ban wan ban aiti ia ka jingtyrwa ha kaban pynkylla ia ka rukom treikam ka MPSC.

Haba kdew ia ki katto katne ki jingai jingmut, u samla Reuben ula ong “Ngim kwah shuh ban don ka jingthungkam ia ki riewsain pyrthei hapoh ka MPSC. Lad aka dei ban don ruh, ki briew ba shah thung ki dei ban don ha ka kyrdan kaba heh bha namar ki dei kiba khmih ia ka Commission, kaba khmih ia ka lawei jong ki samla pule”.

“Nalor kata, ngi kwah ruh ban ring phlim ha ka por Interview ia ka Group-A post bad ia ka Group B,C ba ym dei ban don shuh ka personal interview hynrei ban thungkam ia ki kyrtong kat kum ka jingwan shakhmat jong ki. Kiwei pat ki dei ka jingbuh da ka por haba thungkam kata naduh ka sngi ba pynmih ia ka jingpynbna laitkam bad ngi dawa ba dei ban pyndep noh hapoh ka shisnem” ula ong.