Guwahati, Nailar 01 : Ka Sorkar Assam bad ka Mizoram kila pynlong ia ka jingiakynduh lang ha ka sngi Balang ban iamir jingmut halor ki lad ki lynti ba dei ban shim ha kaban iakhun pyrshah ia ka kam khaii droks bad jingdih droks.
Ha kane ka jingialang la iashimbynta da u Myntri ka Tnad Excise and Narcotics ka Mizoram u Lalnginglova Hmar bad u Excise Secretary ka Assam Indreswar Kalita bad Excise Commissioner Jitu Doley.
Ka jingkhaii droks ha khappud ka dei kawei ka mat ba kongsan bala iakren ha kane ka jingialang bad baroh artylli ki Sorkar kila kut jingmut ban ieng iakhun tyngeh pyrshah ia kane ka kam.
U Hmar ula ong ba u droks heroin bala khaii sha Assam na Myanmar u dei uba wan poi sha Mizoram hadien bala dei sain biang ia u.
Ula pyntip ba ula ioh pdiang ia ki khubor halor ka jingwan poi bun bah u droks heroin bad kiwei kiwei ki drok ha Assam bad ki nongkhaii kila ioh shang laitluid hapoh ka Jylla.
Ki Ophisar ka Sorkar Assam kila pyntip ha u Hmar ba kin sa shimkhia ia kane ka kam bad kin sa iakren bad u Myntri ka tnad Excise Keshab Mahanta, uba dei ban wan iashimbynta ha ka jingialang hynrei ula pep namar ka jinghap beh ia kiwei pat ki kam.
