Shillong, Naiwieng 23 : Ka Khasi Students Union (KSU) kala leit thang ia ka Beat Office jong ka Sorkar Assam bad ruh ia kawei ka Bolero jong kane ka Ophis ha shnong Mukroh kum ka jingkput ia ka jingshah siat iap ki 5 ngut ki riew paidbah hynnin ka step ha ki Pulit Assam bad Forest Ranger.
Ia kane la pyntip da ki Nongialam ka KSU lyngba ki rynsan Social Media haba iathuh ba ki Dkhot ka KSU kila shim ia kane ka sienjam namar ka jingkynnoh bym don ki nongwan ai jingiarap ia ki paidbah na ka Sorkar Jylla bad kumjuh ruh ki Pulit.
Ha kajuh ka por la pyntip ba ka KSU-West Jaintia Hills kila tawiar ia ka Ialong Hospital, Jowai hynnin ka sngi ba-ar, ban khang pyrshah ia ka jingthmu ban aiti ia ka metiap jong u Forest Guard ka Assam haba buh jingdawa ba katba ka Sorkar Assam kam pat aiti ia baroh ki Pulit ba siat ia ki paidbah, ka KSU ruh kan khang ban aiti ia ka met une u nong Assam.
Ki Nongialam kila pyntip ba ki Nongialam bad ki Dkhot ka KSU na East Khasi Hills District kila hiar hynne ka step phyrngap por 1 baje sha Jowai ban kyrshan lem ia ki paidbah bad ia ki dkhot ka KSU kiba ap ha Iaiong Civil Hospital.
Ka KSU kala pynpaw ruh ia ka jingbitar halor ka jingkynnoh ba ia ka metiap jong ki Khasi la shu ieh sah ha trok pickup ha Iaiong Hospital katba ia ka metiap jong une u Forest Guard ka Assam la pynthiah ha jingthiah ha kane ka hospital.
La pyntip ba hynnin shiteng miet, kala mih ka jingiatai nia kaba khluit hapdeng ki dkhot ka KSU Jowai Circle bad ki briew ka Sorkar Jylla ha Iaiong Civil Hospital bad ka daw ka dei namarba ki Pulit ka Jylla ki mut ban leit aiti noh ia ka met utei u nong Assam (uba donkti ban siat iap ia ki Khasi ha Mukroh) sha ki Pulit ka Assam.
Ka KSU-Jowai Circle kala pyrshah jur ban sei ia kane ka metiap na Hospital bad buh iaka jingdawa ba ka Sorkar Assam ka dei ban aiti shuwa ia baroh ki Pulit Assam kiba donkti ban pyniap ia ki Khasi ha Mukroh sha ki bor sorkar Meghalaya ban tian bishar nalor ban ai ruh ka jingkular ba kan ym pyndik shuh ia kino kino ruh ki shnong Khasi kiba don ha khappud bad ka Assam.
Ka KSU ka pyntip ba ia ki arngut kiba mynsaw ha Mukroh la rah noh sha NEIGRIHMS ban ioh ia ka jingsumar bapaka bad la synran ia ki da ki Dkhot ka KSU Nongmensong Unit bad ka KSU Mawkasiang Unit.
