Shillong, Naiwieng 22: Ka United Democratic Party (UDP) Youth Wing Shillong City District bad ka Meghalaya Pradesh Youth Congress (MPYC), kila pynrem jur ia ka jingshah ther kuli ki riew paidbah ba lui lui ha ki Pulit ka Assam hynne ka step ha Mukroh kaba lam sha ka jingiap ki 5 ngut ki nong Mukroh.
Ka UDP Youth Wing ka pynremjur ia ki pulit khawpud ka Assam kiba lah nud ban shim noh ia ki mynsiem kiba lui-lui kiba dei ruh ki para doh para snam bad dawa ruh ba dei ban siew ia ka bai lutksan sha kito ki longïng kiba lah ngat ha kane ka lanot ha kane ka jingjia kaba sngewsih bad kumjuh ruh ia kito kiba mynsaw.
Ka seng ka dawa ruh na u myntri ka tnat kam pohïng ban pynlong daka jingtohkit kaba khuid khnang ban lap ia ki jingshisha baroh.
Kumjuh ruh ka Meghalaya Pradesh Youth Congress (MPYC) ka la pynrem jur ia ka jingleh riewkhlaw ki pulit ka Assam bad ong “Ngi ieng tylli bad ki paidbah ka Mukroh ha kane ka jingjia kaba la wan kah dum ia ki bad ngi phah ia ka kyrwoh sngewlem sha ki bahaiing hasem jong kine kiba la duh noh ia ki baieit ba thoin”.
“Ngi dawa ba ka sorkar jylla kadei ban ai ka jingsumar kaba paka sha kine kiba don hapdeng ka jingmynsaw” la ong ka kyrwoh na u vice president ka MPYC u bah Banphira Basaiawmoit
U bah Banphira u la ong ba ka MPYC ka dawa ba ka sorkar Assam kadei ban shim ia ka jingkitkhlieh bad ban pynshitom pyrshah ia kiba siat iap ia ki mynsiem briew ba lui lui bad ka sorkar pdeng kadei ban tular halor kane ka bynta ruh
