Nongpoh, Lber 06: Ki runar ki bym lah ban tip ki dei kiei, kila thang dusmon ia kawei ka khlaw shnong kaba don ha ka Shnong Mawrathud, Ri-Bhoi District bad pynjulor ia ki jingthung jingtep ba don ha kane ka khlaw.
Kane ka jingjia kala jia hynnin ka janmiet 5 tarik hynrei donbok da ka jingiamih kloi jong ki nongshongshnong, kila lah ban tem ia kane ka ding ba klang shuwa ba kan pur kylleng ki jaka.
U Bah Clever Shadap, Rangbah Shnong ka Mawrathud, ula suba ba don ki riew shimkabu kiba la thang dusmon ia kane ka khlaw shnong kum ha kane ka por ba dang tyrkhong ka mariang.
“Da ka jingkloi ban iamih ki nongshong shnong naduh ki rangbah bad samla ha ryngkat ki nongkitkam ka Land and Forest Community, la lah ban tem noh ia ka ding kaba la klang bha bad ia kane ka ding la lah ban tem haduh ka step jong ka 6 tarik” ula ong.
U Bah Cever u pyntip ba ka Shnong kala pynlong mynta ia ka jingtohkit ban lapdien ia ki briew kiba donkti ban leh ia kane ka kam.
Ha kajuh ka por, ka Shnong ka la pynmih syndon ia ka jingmaham kaba tyngeh pyrshah ia ki riew paidbah la ki dei ki nongshong shnong ne ki nabar ka shnong ba kim bit ban leh ia kino kino ki kam pynjot kum ka jingthang khlaw dusmon ne kino kino bad lada lap, kita ki briew kin shah pynngat ha ka ain shnong bad wat ha ka ain jong ka sorkar.
