Thalain tyngeh ka Sorkar Meghalaya ia ka NTA | Dawa pynngat ia ki samla pule ban thoh eksam CUET ha Jylla

Shillong Jymmang 12: Ka Sorkar Jylla kala kyntu ia ka National Testing Agency (NTA) ba kan pynkynriah noh mardor ia ka eksamin Common University Entrance Test (CUET -UG) na ka bynta ki samla pule ka Meghalaya, kiba la shah pynngat ban ialeh ia ka eksamin sha kiwei pat ki jylla.

Haba pyntip ia kane hynne ka sngi Nyngkong, u Myntri ka Pule Puthi u Rakkam A Sangma ula ong, “Ngi lah phah ia ka shithi kaba tyngeh sha ka NTA hynne ka sngi, ba ka dei ban pynkynriah ia baroh ki eksam na ka bynta ki khynnah ka jylla, kiba la shah pynngat ban leit ialeh ia ka eksamin sha ki jaka kiba jngai bha na la ka jong ka jylla”.

“Ngi lah dep bthah ia ka tnad pule puthi ba kan iakren bad kitei ki khynnah kiba la shah ktah” ula ong.

U Sangma ula pyntip ruh, ba ka NTA kala iakren bad ka sorkar jylla ban ithuh shuh shuh ia ki jaka thoh eksam khnang ba yn lah ban buh sa 200 tylli ki kor computer, ba ka jingpynlong ia ka eksam CUET kan long kaba iaid beit. Kumta ka kynhun jong ka NTA kan sa pynlong ia ka jingjurip ia kitei ki jaka kiba la dep ban ithuh.

“Ngi lah dep ban ithuh ia kitei ki jingtei bad ngi lah pyntip sha ka NTA bad lashai ka sngi kin wan ban jurip ban khmih la kitei ki jaka kila long ne em kiba bit ba biang” ula ong.

Nalor kane, u Myntri ula ong ruh ba ka sorkar jylla kala ban jur tyngeh bha ia ka jingdonkam ka NTA ban thung ia u Nodal Officer uba pura ha ka jylla.

“Ka NTA ka lah dei ban pyntip ia ka sorkar jylla ha ka por kaba biang, khnang ba ngin lah ban shim ia ki sienjam bad ba ki khynnah pule kin ym mad ia kino kino ki jingeh” ula ong bad ka bynrap, “Hynrei hadien ba la ioh jingtip halor katei ka mat, kumta u Myntri Rangbah ula iakynduh ia u Myntri ka sorkar pdeng bad ngi lah don ha ka kam (ban pynbeit ia kane ka mat).”

U Myntri ka pule puthi ula ong, ruh ba ka jingeh kala mih biang ha ka jylla Meghalaya kadei namar ba ka jingpulom jong ka NTA ban iakren bad ka sorkar jylla.

“Ma ki (NTA) kila iakren ne ai jingtip tang shi sngi ne ar sngi shwa ban long ka eksamin. Ka eksam kan sdang naduh lashai bad kila bun ki khynnah kiba la mih ban leit sha ki jaka ki bapher bapher. Kumta ngim lah ban leh eiei halor kata. Hynrei hadien ba u Myntri Rangbah ka jylla ula shimkhia bad u Myntri ka Sorkar Pdeng hynnin ka sngi ha Delhi, ka NTA kala iakren bad ka Sorkar Jylla ban ithuh shuh shuh ia ki jaka ban thoh eksam bad ngi lah don ha ka kam mynta”.

Halor ka jingkylli, u Sangma ula ong, “Nga long thikna ba kito ki khynnah pule kiban don ia ka eksam hadien jong kane ka taiew, kumta ia katei ka eksam yn sa pynkynriah noh bad yn sa pynkynriah ruh ia ki jaka thoh eksamin kumba la kular da ka NTA. Na ka bynta kaba lashai ka sngi, katto katne ki samla pule ki lah dep mih ban leit ialeh ha ki centre kiba don hajan.

Hynrei ia kito kiba la pynngat ban ialeh ha ki jaka kiba don sha jngai kum ha Jharkhand, ia kitei yn pynlong ha 19 tarik u Jymmang bad na ka bynta katei, nga tharai ngi lah ban pynbeit noh. Nga mut ba ngi khmih lynti na ki khynnah pule kiba shah pynngat ha ki jaka kiba don sha jngai, ia katei ngin shimkhia”.

Halor ka daw jong ka jingbym lah ban don ka jingpynbeit kaba paka halor kane ka mat, u Sangma ula ong, “Kane kam dei namar jong ka sorkar jylla ban shim ia ka rai. Kumta ngi lah dep thaw ia ka State University bad ki College kiba lah Affiliate ne pyniasoh bad ka State University kim donkam shuh ban ialeh ia ka eksam CUET ban ioh ia ka Admission ne jaka pule. Ka NTA ka hap ban pynlong bad kadei ka rai ka jong ki, ngim lah ban leh eiei halor kane”.

Katkum ka jingong ka jongu, ki kam ki jam jong ka jingpyniasoh ki college bad ka state university kadei kaba la sdang ban iaid shakhmat.

Haba kylli biang ba ka pule puthi kadei ka mat kaba hap hapoh ka jingkhmih jong ka sorkar jylla bad hato u shim ba ka jingleh ka NTA ka long kum ka jingiuhroit ia ka sorkar jylla, u Myntri ka Pule Puthi ula ong, “Kam long eh kumta, ka long kaba shai ba kito ki college kiba pyniasoh bad ki skulbah jong ka Sorkar Pdeng ki hap ban ialeh ia ka eksam CUET. Kumta ngin sa kyrpad ia ki jaka pule ba balei ngi hap ban mad ia kum kitei ki jingeh man la ka por. Lada ki lah ban pyniasoh bad ka State University, kan long kaba suk bha”.

Ula iengskhem ruh ha ka jingpynpaw ba ia katei ka kynrum kynram kadei kaba lah ban kiar, lada ka NTA kala iakren bad ka Sorkar Jylla ha ka por kaba biang. “Ngi lah dei ban leh baroh ia kiei kiei ki sienjam kiba ngi deoi ban shim” la ong u Sangma.