Shillong, K’lyngkot 21 : Ka Lhingkim Haokip, ka General Secretary ba dang shu thung thymmai ka All India Mahila Congress, kala thalain ia ka Sorkar u Modi namar ki policy pyrshah ia ki kynthei, bad ong ba katba ka Sorkar ka kren ia ka jingpynkupbor ia ki kynthei, ki kam jong ka pat kila nang pyntroin ia ka jingkamai laitluid jong ki kynthei.
“Ka jingpynkupbor kam dei ka slogan kum ka “Beti Bachao’. Ka jingkupbor ka mut roti, rozgar aur suraksha” ong ka Haokip haba ban jur ba ka congress party ka ngeit ba ia ka jingpynkupbor ym lah ban pynkut tang ha ka jingkren.
Ka Haokip kala kdew ba ki kynthei ki dei kiba shah ktah jur tam ha ka jingkiewdor ki mar ki mata, ka jingnang duna ki skhim ka bha ka miat, ka jingbym iohkam bad khate ia ki jingkyrshan ha ka kamai jakpoh.
Kala pynbna ba ka Mahila Congress kan sa ialam ban pynlong ia ka jingiakhih ba jai jai, pynlong ia ki awareness campaign bad rah iakren ia ki jingeh ki kynthei na ki shnong sha ki surok bad sha ka Iingdorbar Parliament.
Haba kren halor ka kam jong ka MGNREGA, ka Haokip kala ong ba ka Sorkar u Modi kala nang pyn troin ia ka skhim, watla ka dei ka hok ba shong ain ban iohkam bala pynthikna da ka Parliament.
“Ka MGNREGA ka dei ka hok, ym ka jingleh sngewbha. Ka jingpyntroin ia ka MGNREGA ka dei ka jingthombor beit beit ia ki kynthei, ki nongtrei bad ki nongkyndong ba duk” kala ban jur.
Ka Haokip kala ban jur ba ki kynthei ki dei ki nongtrei ba bun eh ha ka MGNREGA bad ia ki kynthei riewlum bad nongkyndong, kane ka skhim ka dei ka tyllong ba kongsan ha ka kamai kajih, ka jingioh ia ki jingbam tei met bad ka jingioh ia ka burom.
Ka Mahila Congress kala dawa ia ka jingsiew bainong ha ka por kaba biang, ka jingai ia ka mang tyngka kaba pahuh bad ban pyrshah ia kano kano ka jingpyntlot ia ka Act.
Ka Haokip kala pyntip ba ka Mahila Congress kan iai bteng ia ka jingialeh ban pyrshah ia ka MGNREGA bad iakhun pyrshah ia ki policy ba buh ha ka jingma ia ki kynthei, ki nongtrei bad ki briew ba duk.
