Thalain ka HYC ia ka Sorkar halor ka jinghiar ka kyrdan pule dangle ka Meghalaya | Dawa wanrah kloi ia ki jingpynkylla

Shillong, Jymmang 25: Ka Hynniewtrep Youth’ Council (HYC) ha ka sngi Nyngkong kala pynrem jur ia ka Sorkar Jylla halor ka kaiphod kaba ai kyrdan ia ka jylla Meghalaya kum kawei na ki Jylla kiba duna tam ha ka pule dangle ha ki skul haba niew ia ka “kum ka jinglehrain hakhmat ka Ri” bad dawa ban tynrong mar mar ia ka jingkitkhlieh.

Ha ka kyrwoh na u President ka HYC u Bah Roy Kupar Synrem, ula ong, “Ka seng ka pynpaw ia ka jingpynrem kaba jur bad ka jingbym sngewtynnad halor ka jingmih ka kaiphod ba ka Meghalaya kadei kaba don ha ka kyrdan kaba duna tam ha ka pule puthi ha ki skul”

“Kane kam dei tang ka kyrdan kaba sniew hynrei ka long ka jingjah burom ha ka ri baroh kawei bad ka dak kaba shai ba ka Sorkar Jylla ka la rem lut ha kaban ïada ïa ka lawei jong ki khynnah bad ki samla ka Jylla” la ong ha ka kyrwoh

Ka HYC kala kynthoh ia kaba kala ong ba kadei ka jingdkoh hapdeng ka jingbuh thong jong ka sorkar bad ka jinglong jingman kaba shisha ha madan.

“La bun snem, ka Sorkar ka ju kren shaphang ka roi ka par, ka jingkiew shaphrang, ka jingpynkupbor ïa ki samla bad ka jingthmu ban pynkylla ïa ka Meghalaya kum ka shlem jongka pule puthi. Hynrei, sha lyndet jong kine ki kyntien bad ki jingpynbna paidbah, ka jingshisha kaba sngewsih ka long ba da ki hajar ngut ki samla pule ki shah ktah ha ka rukom hikai ia ka pule putti kaba duna bha, ka jingpep skul shiteng por, ka jingduna ki jingtei ba donkam bad kiwei ki jingdonkam kiba biang, bad ka jingbym don ka jingthmu kaba treikam hok ban kyntiew ia ka pule puthi” la ong ha ka kyrwoh.

Ka HYC kala kynthoh shuh shuh ba watla lah pynlut da ki klur tyngka ia ka pisa u paitbah. “Ka long kaba sngewlehrain ha kaba da ki klur tyngka lah pynlut ia ka pisa paitbah bad ki jingpynbna kiba heh kidei kiba la iai pynbna, hynrei ka Meghalaya mynta ka hap ban iakhun sha tdong eh, katba ki pateng ban wan kin hap siew ïa ka dor jong ka jingbym shimkhia bad ka jingbakla ha ka rukom treikam” la ong ka HYC.

“Ka lawei jong ki khynnah jong ngi kam lah shuh ban long ka bynta jong ki jingïalehkai saiñ pyrthei ne ki jingpyni kiba tang na Shabar” kala bynrap.

“Ka pule puthi kam dei ka bynta kaba lah ban pynkiew tang da ki jingkren paidbah ne ki jingpynbna paitbah. Ka donkam ïa ka jingïohi jngai, ka jingbahkhlieh bad ka jingtrei kaba neh slem. Hynrei, kaei kaba ka Meghalaya kala sakhi mynta kadei ïa ka rukom treikam kaba la ailad ban nang pynhiar dor, katba kito kiba don ha ka bor pat ki iai bteng ban don sha jngai na ka jingshisha kaba mad da ki samla pule, ki kmie ki kpa bad ki nonghikai”.

Ka HYC ka dawa ban shim ia ki sienjam kiba mardor na ka liang jong ka sorkar jylla. “Ka HYC ka dawa ïa ka jingbah khlieh kaba mardor na ka Sorkar Jylla bad ka kyntu ban shim mardor ïa ki sienjam pynbeit, kynthup ïa ka jingbishar kaba bniah ïa ka rukom long ka pule puthi, ka jingpynpaw paidbah ïa ki jingduna ne jingbakla ka rukom treikam bad ka jingthmu ban pynkylla ha ka por ba la buh khnang ban pynim bad pynbha biang ïa kane ka bynta kaba kongsan” la ong ha ka kyrwoh.