Nongstoiñ, Jylliew 03: Ka Mawshynrut konstitwensi ka la long kawei na ki konstitwensi kaba donbok shisha, ha da ka jingïoh ïa ka Goverment Model Degree College, kaba tang hadien san bnai ba hiar jurip u MLA, ka jing pyntrei ia ki kam kala sdang ban iaid shakhmat.
Kane ka Degree College, kaba bei tyngka da ka Ministry of Human Resources ka sorkar kmie lyngba ka Rashtriya Uchchatar Shiksha Abhiyan (RUSA).
Ki Nongshongshnong ka thain kim shym poi pyrkhat ba kane ka College kan paw dak noh ha ka jingpyntrei iaka namar ka jingsngew ba lehse kane ka project kan long kum kiwei pat ki project kiba sahkut ha suin.
La khmih lynti ba ka jingïoh ïa katei ka college hapoh Mawshynrut kan ai jingmyntoi ym tang ïa ki paidbah jong ka Mawshynrut, hynrei ïa ki nongshong shnong kiba marjan bad ïa ka thaiñ hi baroh kawei.
Kum ban shu pynkynmaw, u Bah Methodios Dkhar, Myntri ka sorkar jylla bad MLA ka Mawshynrut ha ryngkat ka jingïadonlang ki riew rangbah bad ki nongshong na ka thaiñ, dang myn ha u bnai Nohprah jong u snem 2025, ki la leit ban jurip bad ai lain ïa katei ka jaka na ka bynta ban shna ïa ka building ba pura jong katei ka college.
Ia kane ka college la mang ban tei kumba 15 klur ei ei bad mynta la ïohi ba ki kam ki la sdang ban kren khamjam ban ïa ka ktien.
U bah Breswell Paliar uba dei uwei na ki riew rangbah katei ka thaiñ u la ong ba ka jingioh ia kane ka college sorkar, kan kham pynsting ia ki jingkit ba khia jong ki kmie ki kpa, khamtam kiba duna ha ka ioh ka kot ban phah pule ia ki khun jong ki.
Ula ong ba hadien ba la dep tei ia kane ka college, ki samla pule kim donkam shuh ban dang iabeh ban leit pule shabar ryngkat ka jinglut ba heh, hynrei kin ioh ban bteng ia ki jingpule jong ki ha la ka jong ka jaka, ym da donkam shuh ban leit shabar.
