Aizawl, Jylliew 28 : Ka Balang Presbyterian ka Mizoram kan noh synniang T. 8 lak na ka bynta ki lanot shlei um ha ka jylla Assam, ong u nongialam ka Balang ha ka sngi Nyngkong ba la lah.
U Rev. Vanlalnghaka Ralte, moderator ka Synod, ka ba dei ka tnat treikam ba hakhliehduh jong ka Balang Presbyterian u la ong ba ka jingialang hapdeng ki nongialam ka Synod ha ka sngi Nyngkong ba la lah ka la iamir jingmut halor ka jingshlei um ha ka jylla ba marjan bad ka la shim ia ka rai ban ai ia ka jingiarap ka ba T.8lak na ka bynta ki lanot shlei um ha ka sor rit Silchar bad ki bynta jong ka Cachar district ka Assam.
U Ralte u la ong ba ia kane ka jingiarap yn aiti ha u deputy commissioner ka Cachar, u Keerthi Jalli. Nalor kata u la ong ruh ba ha ryngkat u secretary ka Synod u Rev. Z.D. Lalhmachhuana kin leit mynta ka sngi ban aiti ia kane ka jingiarap sha utei u deputy commissioner ka Cachar.
Nalor kata u Ralte ula ong shuh shuh ba ka Balang kan pyrkhat ruh ha ka ba iadei bad ka jingai jingiarap pisa sha kito ki briew ki ba shong ba sah hapoh ka mission compound jong ka balang Presbyterian ha Silchar ki ba la shah ktah ha ka jingshlei um, kata lada ka long ka ba donkam.
Ha kawei pat ka bynta na ka liang ka Kolasib sub headquarter jong ka Young Mizo Association (YMA) ha ka sngi Nyngkong ba la lah ka la aiti ia ka jingiarap ka ba mar T.50,000 sha u deputy commissioner ka Cachar bad ka tnat YMA ha Silchar na ka bynta ki lanot shlei um. U president ka Kolasib sub headquarter YMA u Thomas D. Lalengliana u ba la lamkhmat ia ka kynhun ka YMA u la ong ba ka seng kam lah satia ban shu leh klet halor ka jingeh ka ba ki nongshong shnong ka Silchar ki la hap ban mad namar ka jingshlei um.
