Agartala, Jylliew 28 :U nongialam ka Liang Pyrshah ha Tripura, u Manik Sarkar ha ka sngi Nyngkong, ula kynnoh ba u Myntri Rangbah (CM) ka jylla u Manik Saha u la jop ia ka ilekshon shiteng samoi lyngba ki kam leh thok ha ka jingiathep vote hapoh ka constituency ka jong u.
U Sarkar u la pynpaw ruh ka jingsngew bynniaw halor ka jingmih jong ki kynrum kynram ha ka jylla khyndiat por hadien ba la pynbna ia ka result jong ka ilekshon.
“Ha ka ba nyngkong, ki nongthep vote ki la shah byrthen bad pyntieng pynsmiej ha ba ki dang leit sha ki jaka thep vote, bad hadien ka jingiathep vote, ki paidbah ki la ngat sa ha ki jingshah thombor ha ki nongkyrshan jong ka BJP,” ong utei u CM barim.
Ha ba kylli la ka CPI (M) kan buh ne em ka jingujor sha ka sorkar, u Sarkar u la kynthoh pyrshah ia u CM Manik Saha da ka ba ong, “U CM da lade hi u la pyndonkam bakla ia ka bor ban kyrshan ia ki kam leh thok ha ka jingiathep vote.”
Bun ngut ki nongkyrshan jong ka CPI (M) ki la ngat ha ka jingshah thombor ha ki suba kynhun runar jong ka BJP, ha ka ba ka jingpyni bor jong ka BJP hadien ka jingjop ha kane ka ilekshon ka la kylla long ka miet ka ba triem na ka bynta ki nongkyrshan jong ki liang pyrshah.
Ha ba kren halor kane ka phang, u secretary ka CPI (M) ha ka jylla, u Jitendra Chowdhury u la ong, “Ka BJP ka la ialam ia ki samla sha ka jingjot. Ki samla ki la shah ialam bakla halor ki nongrim sain hima jong ka BJP ki ba long pyrshah ia ki riti synshar ri, bad ki samla ki la shim ia ka lynti jong ka jingiaumsnam. Dei ban pynsangeh mardor ia kane.”
Ha kawei pat ka bynta, ki nongkyrshan ka CPI (M) ki la pynlong da ka jingkhang ia ka lynti surok ha Shyamali Bazar ha Agartala hadien ba laitylli ki dukan ki la shah thang dusmon ha ki suba nongkyrshan jong ka BJP, kata hadien ba la pynbna ia ka result na ka bynta ka ilekshon shiteng samoi.
