Guwahati, Jylliew 25: U Chairman ka Reliance Industries u Mukesh Ambani ha ryngkat u khun jong u, u Anant Ambani ki la noh synniang T.25 klur sha ka Assam Chief Minister Relief Fund na ka bynta ki kam aijingiarap sha ki paidbah nongshong shnong ka jylla ki ba la shah ktah ha ka jingshlei um.
Na ka liang u myntri rangbah (CM) ka Assam u Himanta Biswa Sarma u la pynpaw ka jingsngew nguh ka ba khraw na ka bynta u Mukesh Ambani bad u Anant Ambani halor ka jingdon ryngkat bad ki nongshong shnong ka Assam ha ka ba kum kane ka khep jong ka jingeh da ka ba noh synniang T.25 klur sha ka CM Relief Fund. “Ngi ai ka jingkhublei ka ba kyrpang halor kane ka sienjam ka ba ki la shim bad kane kan iarap shibun ha ka ba iadei bad ki kam aijingiarap sha ki nongshong shnong ki ba la shah ktah jur ha ka jingshlei um,” ong u Sarma lyngba ka twitter ha ka sngi Thohdieng ba la lah.
Dang ha kine ki khyndiat sngi ba la dep, u nongrwai ba pawnam u Sonu Nigam, u director Rohit Shetty bad u tyngshop ka Bollywood u Arjun Kapoor ki la noh synniang mar T.5 lak sha ka CM relief fund. Kumjuh na ka liang u Music producer u Bhushan Kumar ruh u la noh synniang T.11 lak sha ka CM fund na ka bynta ki lanot shlei um.
Ka Assam ka la ngat ha ka jingshlei um ka ba shyrkhei mynta ka snem bad ka ba la shim ruh ia ka jingim jong kumba 118 ngut ki briew namar ka jingshlei um bad ki jingjia twa khyndew.
